Maidnedalin jäl’gmäižel päiväl Čalna-küläs tehtihe sur’ festival’. Kaimdaha tal’ved Talviukkon adivoihe kerazihe äi rahvast. Adivoiden täht oli tehtud čoma koncert, kus pajatadihe pajoid, častuškoid, vedetihe horovodoid, vändihe erazvuiččihe vändoihe, märitihe vägel, pašttihe kürzoid. Iloitelihe kut lapsed, muga vanhembad-ki.
Ezmäižen kerdan oli tehtud konkurs ”Karjalaižed sul’činad”, miččehe ühtniba restoranoiden keitäjad. Hö paštoiba tradicionaližid kürzid erazvuiččen päliženke. Konkursan vägestajikš tegihe keitäjad ”Lamba”-kafespäi. Heiden kürzad oliba kaikid hoikembad da magukahambad. Karjalan pämez’ Artur Parfenčikov tariči tehta tulebal vodel äjak-se nominacijoid i tehta sul’činoiden konkurs Karjalan küliden keskes, ved’ kaikuččel emägal oma ičeze peitused sul’činoiden tehtes.
Mastar’-klassan sul’činoiden vaumičendan mödhe tegi ”Kiži”-muzejan radnik Anna Anhimova.
— Mastar’-klassad rahvaližiden sömižiden mödhe kaiken oma popul’arižed, niihe surel tahtol ühtneba kut Karjalan eläjad, muga adivod-ki. Praznikal ühtes Karjalan pämehenke da hänen akanke mö vaumičim todesižid sul’činoid šonanke kut mindai baboi openzi da völ venälaižes päčiš. Om hüvä, miše sul’činoiš pagištaškatihe, meletan, ned linneba mugoižed-žo popul’arižembad turistoiden keskes kut kalitad-ki, sanub Anna Anhimova.
Tradicijan mödhe praznikan lopus polttihe Maidnedalin ol’gesine neižne — muga vanhan veron mödhe kaimdas tal’ved i vastatas kevät.