“Ajammo, syömmö” Suures Sellis
Suuren Sellin kyläs piettih NTV-kanualan Ajammo, syömmö -programman kuvuamizet. Kuvuamizih yhtyttih anukselazet Vasilina Bobina, Kat’a Fedotova, Irina Nikitina, Darina Vahramejeva sego Eloksen ratas -muzeiteatran ozuttelijat Vladimir da Marina Prošeluikinat. Programman vedäjänny oli Federiko Arnal’di. Omis ruadomatkois Federiko tuttavuu vähäluguzien rahvahienke, ebätavallizien ammattiloin edustajienke, tutkiu kanzallizii syömizii da ičegi opastuu luadimah niilöi.
— Uvven programman s’užietan mugah Federiko rounoku tulou kyläh oman buaban luo da valliččou sie ičele andilastu. Karjalazet sanotah: “Ei se ole emändy, kudai äijän pagizou, a se on, kudamal riehtil rämizöy”. Kaikinhäi tietäh, gu miellyttiä nuordu brihua voibi magieloil syömizil. Sendäh neidizet varustettih omale sulhazele mintah karjalazen syömizen, sanou Anuksen kanzallizen muzein johtai Irina Romanova.
Anuksen ližäopastuksen keskuksen metodistan Irina Nikitinan sanoin mugah, rodih hyvä juumorus’užiettu.
— Minä sie olin andilahannu. Minul oli kebjei olla sit roulis, gu enne sidä puutui olla laval artistannu. Gostitin minä kallistu gost’ua ičen luajitul leibyvuasal, kudai oli azuttu vahnan karjalazen retseptan mugah. Olen hyväs mieles, gu tuttavuin Federikonke. Häi on hyvä ozuttelii, sanou Irina.
Kedä valličči Federiko, tiijustammo jo tänä suovattan 28. syvyskuudu NTV-kanualan Ajammo, syömmö -programmas. 0+
