Tunnettu valmistaja on Karjalan muan lapši
Kim Päätalo (1938—2024) on Neuvoštoliiton anšijoitunut ampumahiihtovalmistaja, Venäjän anšijoitunut hiihtovalmistaja, yhekšän olimpijakisan šekä kahentoista muailman meštaruškilpailun ošallistuja. Yli 30 vuotta hiän omisti ruavolla muan urheilujoukkojen kera. Nuorilla ampumahiihtäjillä šekä hiihtäjillä on keneštä ottua esimerkki, a Karjalan kaikilla eläjillä on keneštä olla ylpeinä.
Vuuvven 2013 Rudolf Toivosen tekstistä šuamma tietyä, jotta Kim Päätalo šynty 20. šulakuuta 1938 Uhtuošša. 1930-luvulla hänen tuatto Jegor Päätalo Šuomen kanšalaisena tuli Oulušta Neuvoštoliittoh rakentamah kommunismie. Kim Päätalon muamo Ol’ga Stepanovna šynty Kalevalan piirin Jyvyälahešša. Hänen juuret ollah Vienan Karjalašta: tuatto oli Kargujeven šukuo Latvajärveštä, muamo — Kenijevien šukuo Jyvyälahešta. Näissä piirilöissä Elias Lönnrot keräsi materialija muailman tunnettuo Kalevala-runoelmua varoin.
Šovan aikana muamo Ol’ga Stepanovna Sulo- ta Kim -poikineh oli evakošša Arhankelin alovehella, a tuatto Jegor Päätalo oli šiirretty ruatoarmeijah Čel’abinskih, missä hiän kuatu.
Šovan jälkeh Ol’ga Stepanovna myöšty Uhtuoh. Hiän ruato keittäjänä ruokalašša, a pojat opaššuttih Kalevalan keškikoulušša. Šeiččemen luokkua lopetettuo vuotena 1955 Kim Jegorovič mäni töih Uhtuon lespromhosih, missä ruato mečän vaštah otošša.
Vielä koulušša opaštuos’s’a Kim Päätalo ošallistu kaikkih hiihtokilpailuih. Hänen liikunta-opaštajana oli Nikolai Petrovič Barantsev. Opaštajan innolla melkein kaikki koululaiset haraššettih hiihtuo, pujottelulaškuo, omin käsin luajitulta trampliinilta hyppämistä, nopieta laškomista mäjeltä. Kim Jegorovič myöhemmin mainičči, jotta juuri näijen Nikolai Barantsevin pitämien harjottelujen anšijošta hänen onnistu šuaha hiihtämisen enšimmäini urheiluluokka.
Koulun ta lespromhosin arkipäivien jälkeh Kim Päätalo mäni armeijah. Hiän palveli Moskovan läššä. Kotvasen aikua hänen onnistu palvella armeijašša yheššä tunnetun hiihtäjän, Karjalan enšimmäisen olimpijameštarin Puatenešta šyntynyön F’odor Mihailovič Terentjevin kera.
Kotiuttamisen jälkeh Kim Jegorovič kaikin voimin harjotteli. Hiän esiinty kilpailuissa Moskovan alovehen Spartak-urheilušeuran joukošša. Ammattiliittojen talvispartakiadissa vuotena 1963 Kim Päätalo kahičči voitti 15- ta 30 -kilometrin hiihtojuokšuissa. Nämä voitot tuotih miehellä Neuvoštoliiton urheilumeštari-arvonimi. Šamana vuotena urheilija otettih Neuvoštoliiton hiihtojoukkoh, kumpasen jäšenenä hiän kilpaili kuuši vuotta.
Kim Jegorovič tuli muan parahakši 70-kilometrin hiihtoajošša. Myöhemmin hiän avasi ičeššä vielä yhen lahjan — olla valmistajana. Mieš šai korkien pedagogisen opaššukšen ta šiitä lopetti Urheiluvalmistajien korkiekoulun.
Hiihtourheilu-leheššä valmistajan 75-vuotispäiväkši oli omissettu artikkeli, kumpasen kirjutti Andrei Kondrašov. Šiitä voipi lukie, jotta Kim Jegorovič oli palkittu monella hallitušpalkinnolla, kahičči šai Vuuvven paraš valmistaja -kunnivonimen. Vuotena 1974 hiän tuli Neuvoštoliiton miehien hiihtojoukon ampumahiihon valmistajakši. A vuotena 1976 joukko hyvin esiinty Talviolimpijakisoissa Insbrukissa, šiitä vuotena 1980 — Leik-Plesidissa.
1980-luvun alušša Kim Päätalo oli kučuttu meijän muan hiihtojoukon valmistajakši, šiinä hiän ruato valmistaja-järještäjänä yli 20 vuotta.
Mieš ei unohtan omašta pieneštä kotimuašta. Tavallisešti myöštyön Murmanskin perintehelliseštä Pohjolan pruasniekašta hiän šeisahtu Petroskoissa, jotta vaštautuo omahisien ta yštävien kera. Kim Jegorovič kävi Kalevalaššaki ta tapasi šielä koululaisien kera.
Venäjän hiihtoajojen federatijon etuštajana Kim Päätalo 28. kešäkuuta 2011 ošallistu F’odor Terentjevin muistomerkin avajaisih Petroskoin Kurgan-hiihtokeškukšešša.
Kiitämmä Ol’ga Sulovna Lehtistä Koštamukšešta, jotta anto meilä tietuo Kim Jegorovičista ta muissutti meilä, mimmoset Karjalašša šankarit on oltu — hiihtäjät, opaštajat, Talviolimpijakisojen voittajat ta ošallistujat — miärätietoset ta voimakkahat ihmiset Karjalan loittosista kylistä!
