“S’amozerjen” artistu kävyi pajattamas Moskovah
Nadežda Vasiljevan omahizet da tuttavat ylen äijäl vuotetah Pesni ot vsei duši -programmua, kudai piäzöy ilmah huomei, 1. talvikuudu Rossija1-kanualal. Kuulužas tv-ohjelmas ozutettih S’amozerje-ansamblin pajattajua Nadežda Vasiljevua. Nähtä omamualastu televiizoras on merkilline pido. Moskovaspäi kodih tulduu Nadežda Kimovna saneli, kui mendih kuvuandat. Naizen sanoin mugah, häi enzimäi ei uskonuh, ku händy kučutah programmah, piätti, ku mošelniekat soitetah.
— Teillyö tulou kuvausjoukko, kuvatah s’užietan teih nähte, sit työ tuletto meile, pajatatto da saneletto omas ičes, sanottih telefonas.
Jälles vai naine tiijusti, ku hänen neron suvaiččijat jo kodvan aigua kirjuteltih kirjazii programman vedäjäle Andrei Malahovale. Yhteh niilöis oli pandu lehtikirjutus, kudai kiinnostutti programman järjestäjii. Sit oli kirjutettu 74-vuodizes naizes, kuduadu kois ei sua tavata: ongo häi repetitsies, konsertas vai yhtehisty ruaduo ruadau. Yhtes toizien naizienke Nadežda Kimovna kudou peittoverkoloi, hommuau evähii, ombelou sumkii mobiliziiruittuloih niškoi. Häi kävyigi yhtes Za mirnoje nebo -konsertuagitbriguadas ezittämäs Donetskan da Luganskan alovehil.
Nadeždan kaikis parahii puolii on suvaičus pajatandah da harizmu. Häi pajattau paikallizes kul’tuurutalois – sih nähte oli tiijustannuh Andrei Malahov.
— Moskovaspäi soiton jälles, tossupiän, minulluo tuli kuvausjoukko Moskovaspäi. Kuvattih kogo päivy. Kuvattih kai kohtat, kudamis minä olen kiini, saneli Nadežda Vasiljeva.
Karjalan eläjil ei ole tavannu piästiä gostii čuajuu juomattah. Rahmannoi emändy gostitti moskovalazii piirualoil omas fatieras. Sit tossupiän huondeksel Nadeždal pidi lähtie Moskovah Šabalovkan uuliččah. Tiet, eländät-syöndät kai maksettih kogonah. Naizel pidi vaiku varustua ruuttu. Naizen kai konserturuutat kuvausjoukon mugah, oldih kirjavat. Nadežda pini piäle oman mielužan valpahansinizen ruutan.
Jessoilan eläjät varustettih Andrei Malahovale tuomazet: kalakurniekan kuhas, šl’uboivaren’n’an da kuvan.
Nadežda Kimovna pajatti stuudies Jagoda-smorodina-pajon, saneli, ku ehti tuttavuo toizihgi programmah yhtynyzih pajattajih.
Nadežda pani merkile, ku monien rahvahien suvaittavu Andrei Malahov on ristikanzu prostoi da “ristikanzalline”.
— A ku hyväle tullah! arvosti tuomazet šoumies.
Mielužas rahvasjoukos Ven’an muan eri čuppuloispäi tulluot neroniekat saneltih omis huavehis, perehis, lapsis da omahizis. Paginoin keskes hyö pajatettih omii armahii rahvahallizii pajoloi da kuulužii hit-pajoloi. Kuvaukset mendih kolme čuassuu, hos ozutahesgi, midä mtäs olis ruadua: pajata da pläkytä käzii.
