Vuvven 2014 val’uuttukriizissu kuhkutti K’alinoin perehty panemah rattahile oma biznessu. Hyö elettih Petroskois, ga piätettih muuttua eloipaikku Säpsän kyläh. Jevgenii oli rakenduslaitoksen johtajannu, Nadeždal oli oma pieni sadutavaroin laukku. Hyö heitettih omat ruavot, ostettih pieni konehozasto da lähtiettih opastumah italielazien juustoloin valmistajikse. Pieneh juustolah niškoi pidi 120 litrua hyväluadustu maiduo päiväkse. Juuston valmistamizekse pädöy vaiku moine maido, kuduas on äijy razvua da proteinua. Mostu maiduo ostettih fermeroil. Algajat juustonvalmistajat suadih neruo ammattih ruadajes.
Ostajua oli ylen äijy. K’alinoil rodih himo valmistua enämbi juustuo da nostua sih niškoi oma fermu. Molodoit suadih abuu valdivospäi oman ruavon kehittämizekse. Ruado rubei kiehumah: Jevgenii da Nadežda ostettih Jessoilan sovhouzas kaksi žiivatanpihua muapalanke Alasalmes. Net pihat oldih hyllätyt, kaldavunnuot seinät da sordunuot levot. Redutukkuloin keskes kazvettih tuhjot. Ga uuzil ižändil oli suuri himo ruadua: yksi piha hyö riičittih, toine pandih kundoh. Kunnostetus pihas nygöi ollah juuston luajinduozasto, kus aigua voibi suaja juustokse kaksi tonnua maiduo, zualu, kudamas voibi oppie juustuo da huonus, kuduas pietäh lehmii da kozii.
K’alinat pandih omah ruadoh äijy den’gua, vägie da suvaičustu. Tottu sanuo, molodoit ylen äijäl suvaijah omii žiivattoi. Sih niškoi, ku juusto olis magukas, pidäy olla hyvä maido, ku žiivatat annettas hyviä maiduo, niidy pidäy hoidua da pidiä hyvis ololois.
Juustonvalmistajan ruado on jygiembi, migu ozutahes. Molodoit jo hyvin nerovuttih da valmistetah magieloi juustoloi jo seiččemetty vuottu. Joga juuston lajii valmistajes käytetäh erii ližäainehii. Juustomuagariloil nevvon oppie Karjalan kivi da Kačotta -juustuo pabuheinänke. “Kačotta” gretsienoriehan libo grivoinke tulou mieleh kaikile. Alasalmi-ferman-juustolan tavaroih kaččojes sylgi valuu.
Kuni rodulehmät syvväh-näčytetäh duuhukastu heiniä, a pualičoil “kypsetäh” juustot, Jevgenii da Nadežda šeikuijah, kui hyö ielleh ruvetah kehittämäh muatalovuttu da kyläturizmua. Hyö jo nostetah uuttu huonustu, kus ruvetah pidämäh lehmii sidomattah. Vaigevuksih kaččomattah K’alinat jo suadihgi vie yksi muapala.
Ližiä lugekkua “Omas Muas” 16. kezäkuudu