Uškokkua tahi elkyä, vain näin še oli
Kalevalalaisilla on hyvin tutut studijon artistat ta šen ohjuaja, Karjalan anšijoitunut kulttuuriruataja Valentina Saburova, ta hyö aina vuotetah uutta tapuamista mielehisien artistojen kera. Vuotetah, šentäh kun tiijetäh, jotta “Muamonkielen šäilyttäjät” lahjotetah heilä unohtumatointa tapuamista taijon kera.
A vielä kaččojat varmašti nähäh näyttelijien kätövyä esityštä ta kuullah kaunista karjalaista pakinua. Ta še on kalevalalaisien artistojen erottava tunnuš: kaikin hyö hyvin paissah muamonkielellä lapšuošta, ta joka kerta, konša esiinnytäh eri lavoilla, propagoijah ta kehitetäh karjalan kieltä.
Uškokkua tahi elkyä, vain näin še oli -näytelmän enši-iltana lavalla eläyvyttih meijän entisen elämän kuvat. Kaikki ne spektaklin johtaja ta ohjuaja Valentina Saburova keräsi Karjalan rahvahankirjailijien tevokšien mukah. Näytelmän pohjašša on Juakko Rugojevin, Antti Timosen, Pekka Pertun, Mikko Remšun ta toisien paikallisien kirjuttajien pienie kertomukšie.
Pienet miniat’uurat annettih artistoilla mahollisuon yheššä kaččojien kera čukeltuo Kalevalan šeuvun istorijah. Ne muissutettih lapšušaikua ta nuorutta, entisen elämän perehistorijua. Esimerkiksi, konša jo ennein kylän ainuon kaupan avuamista šen portahilla keräyty paikallisie emäntie, kumpaset juteltih proplemoista, kerrottih uutisie ta tietyšti levitettih juoruja omista nuapuriloista.
Kaččojat muisseltih, nakrettih, pahekšittih yheššä spektaklin henkilöjen kera. Enši-iltana hyö keššettih hyvin äijän tuntehie.
— Passipo näytelmäštä ta tyytyväisyöštä! Kačoin hyvällä mielin. Toivotan mäneššyštä ta uušie šuavutukšie. Valentina Kirillovna on moločča ta artistat — tovelliset ammattimiehet, kerrottih vaikutelmista kaččojat enši-illan jälkeh.
Toveštah, Valentina Saburova on šuuri moločča! Jo monta vuotta hiän harraštau teatteritaituo. Hänen kollektiivin luvettelošša on kymmenie spektaklija ta joka enši-ilta pietäh šuurella mäneššykšellä. Ohjuajan ta artistojen ammattimeštaruolla monta kertua räpytettih Jyškyjärven, Piäjärven, Koštamukšen šekä Karjalan toisien kaupunkien ta pos’olkojen eläjät.
Kaččojien hyväkšymini ta heijän “Bravo!” on MKŠ-teatteristudijon artistoilla paraš arvošana. Šitä arvoššetah kollektiivin jäšenet ta šen ainani ohjuaja Valentina Saburova.
