Näinä päivinä Kalevalatalo-etnokulttuurikeškukšešša ativoijah näyttelyt “Kuvadka. Onnie tuoja kukla” ta “Joka paikašša omašša kruutašša”. Venäjän kanšojen kanšantaijon ta ei-ainehellisen kulttuuriperinnön vuuvven rajoissa ne tultih Kalevalah Petroskoin Kiži-musejon varaštoista.
Näyttelyššä on esillä töitä, kumpaset kuulutah tunnetun karjalaisen kanšanpuvun ta perintehellisen kuklan muasterin Tatjana Jaškovan tosi rikkahah perintöh.
Tatjana Jaškova on Venäjän Federatijon yleiskoulutušalan kunnivoruataja, Venäjän taiteilijaliiton ta Karjalan muasterien ammattikunnan jäšen, kanšankäyttötaijolla omissettujen kirjojen luatija, Venäjän halličukšen Venäjän šielu -palkinnon šuaja Kanšanmuasteri-nominatijošša. Tatjana Borisovna šiirty tuonilmasih vuotena 2011, ka hänen tuotanto eläy ta ihaššuttau Karjalan eläjie.
Karjalaisen puvun ta perintehellisen kuklan näyttely herättäy kalevalalaisien šuurta utelijaisutta. Piirikeškukšen monilla-monituisilla vierahilla niise on mukava tutuštuo šen näyttelyesinehih. Näyttelyššä on käyty jo hyvin monta ihmistä.
Nuori petroskoilaini Polina Mäkelä tuli Kalevalah kostih ämmön luokše. Ämmön kera tyttö pistäyty etnokulttuurikeškukšeh. Hiän ei šuattan kiertyä karjalaisien kanšanpukujen ta perintehellisen kuklan näyttelyö.
– Vuatteista milma eniten miellytti Kižin antilahan puku ta karjalaini muinaispuku. A vot kuklojen kešeššä en tiijä, mitä kuklua pien parahana, šano Polina.
Ta i mitein vois valita parahan kuklan? Kävijien ieššä on yli 150 kirkašta, ainutluatuista ta värikäštä kuklua.
Näyttelyt “Kuvadka. Onnie tuoja kukla” ta “Joka paikašša omašša kruutašša” ruvetah toimimah Kalevalašša šykyšyh šuaten. On mainittava, jotta niijen järještämini Vienan Karjalašša tuli mahollisekši Kiži-musejon ta Kalevalatalo-etnokulttuurikeškukšen kiintien yhteistyön anšijošta. Šemmosen työn šeuruavašša vaihiešša kalevalalaiset otettih ošua Kalaštajan päivällä omissettuh “Šuureh kalafestivalih”, kummaista vietettih Kiži-šuarella 9.–10. heinäkuuta.
Yhteistyö ei piety, še jatkuu ta tuou positiivisie tulokšie.