“Jänölöin alango” on moine projektu, kudaman on keksinyh taidoilii Sergei Gapanovič. Mies luadi sen sih niškoi, ku luadie vähästy čomembakse meijän Karjalan mua, kiinnostuttua turistoi da jättiä hyvä jälgi ilmazekse igiä.
Vuvvennu 2018 sulakuus Sergei Gapanovič rubei kaiverdamah jänölöi kallivoh, kudai on lähäl Šuojun stansii -kyliä. Se kallivo on 250 metrii pitky da 7 metrii korgei. Sergein mieles oli luadie tuhat jänöidy da loppie ruavot vuvvennu 2020. Ga projektu hätkestyi pandemien da toizien vijoin periä.
Samal aigua, vuvvennu 2018, Sergei pani ruadamah uvven saitan iloverabbit.ru, kus tarkah sellitti, mih niškoi on luajittu hänen projektu da kui voibi yhtyö sih. Idei on moine: joga ristikanzu voi kaiverdua oman jänöin kallivoh Sergein avul libo Sergei iče luadiu sen.
Omas jänöis kallivos pidäy maksua viizi tuhattu rubl’ua. Joga jänöil on oma noumeru, jänölöin omistajien luvettelo löydyy saital. Paikan jänöih niškoi Sergei miäriäy iče.
Omat jänöit ollah jo läs 500 ristittyöl, niilöin joukos on Karjalan piämies Artur Parfenčikov, Ven’an kuulužu matkustai Andrei Šaraškin, Or’ol i Reška -tv-ohjelman vedäi Timur Rodrigez.
– Or’ol i Reška -ohjelmas sanottih, ku minä olen piiteriläine taidoilii, ga se ei ole muga, minä olen rodivunnuh Karjalah, Kondupohjah, huomai Sergei.
Timur luadi jänöin da rinnal Sergei porai loukon kallivoh kolikkoh niškoi.
– Täl “Or’ol i Reškan” jänöil on 460. noumeru. Täs on kolikko, opi hieroldua sidä da roittos ozakas, sanoi Rodrigez.
Pahakse mielekse, se kollikko jo varrastettih, toinah varrastajat ollah ozakkahembat nygöi.
Nygöi kallivos on kaikkiedah läs 600 jänöidy. Ei kai olla noumeroinke. On niilöin keskes erinomaziigi, sanommo jänöin piäkul’l’ukku, jänöi-pizza. Jänöin keskes jo eläygi dinozauru.
– Ylen äijäl suvaičen, konzu lapset ruatah bolgarkal, yhtes omien tuattoloinke tullah da yhtes luajitah jänöilöi, sanou Sergei.
“Jänölöin alango” on Sergein joudoaijan ruado, aijan vietokse da hyväkse mielekse. Paiči sidä miehel on oma biznessu. “Jänölöin alangos” händy avvuttau petroskoilaine Sergei Ribalko. Hyödyy, Sergein sanoin mugah, täs ruavos ei ole. Kai den’gat mennäh ruadoh.
Iče Sergei suvaiččou tuttavuo ristittyzih, matkustua, sanou, mennyt vuon oli Amerikas da ylen äijäl händy miellytti se loittoine mua.
– Minä olen ozakas ristikanzu, sildy ku ruan sidä, midä tahton, sanou Sergei Gapanovič.