Festivalin enšimmäisen päivän iltana 13 joukkuo, jokahisešša kakši henkie, läksi laškomah verkkoja Kuittijärveh. Verkkoja kilpailijilla annettih festivalin järještäjät ta niih oli pantu erikoismerkit.
Kalaštajie kaimattih toivottuon hyvyä pyyvvyštä. Monet ihmiset tultih pruasniekkah kaččomah ta moralisešti avuttamah kalaštajie. Heilä tapahtuman järještäjät – Koštamukšen Sreda-keškuš apulaisieh kera – valmissettih rannalla mukava ohjelma. Hämäräššä nuoret tytöt ta pojat Petroskoin Fire Cats (Tulikiššat) -ryhmäštä näytettih kaunista, kirkašta esityštä Kuittijärven rannalla.
Tulista mielialua šuatuo venehet lähettih järvellä. Yhen joukon kera läksi ni pruasniekan tähtivieraš Alla Mihejeva, näyttelijä ta TV-ohjelmien vetäjä.
Festivalin toisena päivänä Kuitin rannalla oli äijän vierahie, musiikki šoi, lapšet ilošešti juokšenneltih, joka kohašša oli temaattisie muasteri-oppija. Pruasniekan vetäjät huvitettih vierahie ta heitä autto Pervii-kanavan vetäjä Alla Mihejeva. Neičyt šatamanruttoseh šiirty yheštä kyšyttäväštä toiseh. Muhija ta kirkaš Alla veti luokšeh kuin lapšie, niin ni aikuhisie.
Muistih jäi še hetki, konša kalaštajien venehet läheššyttih rantah. Šielä heitä tervehittih Fire Cats -ryhmän tuliset artistat ta vierahien räpytykšet.
Rantauvuttuo kilpailijat ruttoh kerättih omua pyyvvyštä ta lähettih vuatojen luokše. Kilpailu kalaštajien kešen jatku rannalla: heijän piti ottua kalat verkošta, mitata niijen paino, puhistua mujehet ta ottua kaloista mähnät. Mukava luku – yhteheš kalaštajat šuatih 700 grammua mujehmähnyä.
Joka ruavošta joukot šuatih pistehie ta kilpailun lopušša ne lašettih yhteh. Ta nyt tuli aika ilmottua kilpailun voittajat. Enšimmäisellä paikalla piäsi Šeppä-joukko, toisella – Masl’ata-joukko ta kolmannekši tuli Pereh-joukko.
Vuokkiniemi on vanha, alkuperältäh karjalaini kylä. Šentäh festivalissa oli esitetty perintehellisie karjalaisie käsitöitä, šyömisie ta folklorie.
Illalla Vuokkiniemen Ončin talon lähellä vietettih festivalin järještäjän Sreda-keškukšen pitämät tanššit ta konsertti. Šen jälkeh taivašta valotti kirkaš juhlallini ilotulituš.
Vuokkiniemiläiset toivotah, jotta festivali tulou perintehellisekši. On kallista še, jotta pruasniekka kiinnoštau eri-ikäsie ihmisie, še auttau šäilyttyä karjalaisen kylän ainutluatuista erikoisutta ta tuuvva šiih nykyajan vereštä puhallušta.