Priäžän piirin hyvyönluadijat suadih palkindot
Hyvyönluadijoin kilbua pidäy Priäžän piirin Melliččy-fondu. Kilbah yhtytäh ristikanzat, kuduat ilmai ruatah oman kylän hyväkse da yhtytäh erilazih hyvyönluadijoin pidoloih. Kedä niilöis pidäy palkita – vallitah iče rahvas.
Enzimäi rahvas ehoitetah aktiivizii kyläläzii, sit pietäh iänestys, kuduan mugah vallitah kilvan voittajat.
Tänävuon kilbah yhtyi 20 hengie Priäžän eri kylispäi: Pyhärves, Matrosas, Čalnas, Jessoilas, Nuožarves da Vieljärvespäi.
Čalnas palkindon sai kirjuttai L’udmila Mehed. Eläkkehel olii naine alalleh keräilöy internetas den’gua kovah voimatunnuzile da hädäh puuttunuzile ristikanzoile da koittomile žiivatoile, keräilöy erikseh eri toppii – bumuagua, batareikkoi da plastiekkua.
– Mielihyväl yhtyn kaikenmoizih pidoloih oman kylän hyväkse. Puaksuh iče annan ideidy rahvahale. Olen hyväs mieles, ku minule avvutetah luotettavat dovarišat – yksin en voinnus nimidä luadie. Passibo palkindos! – sanoi L’udmila Mehed.
Priäžäs voittajakse rodih Tatjana Korz’uk, Nuožarves – L’ubov’ Ponomar’ova, Matrosas voittajakse vallittih Galina Ivanova.
Palkindot sai kaksi miesty – Sergei Matikainen Pyhärves da Mihail Matvejev Vieljärvespäi.
Jessoilas kilvan voittajakse vallittih Jessoilan kylän administratsien piälikön sijahine Lidija Pajusova. Lidija ei voi kuvitella omua elaigua ilmai hyvii dieloloi. Naine avvuttau hädäh puuttunuzile rahvahale, aktiivizesti yhtyy eri pidoloin järjestämizeh. Tänävuon omal mašinal Lidija veigi syömisty rahvahale pandemien ololois.
– Hyvänluadijoin toimindas minule avvutetah kyläläzet dai omat poijat, vahnembi kudualois ruadau volont’ourannu jo piäl kahten vuvven. Konzu on kannatustu, voibi mäit mukeldua, sanoi Lidija Pajusova.
Nominantoin joukos oligi “Oman Muan” toimittai, vieljärveläine kieliaktivistu– Natalja Antonova. Rahvas kiitettih nastu ruavos karjalan kielen hyväkse da Vieljärvi-järven puolistamizes.
Hyvyönluadii-kilbu piettih Vladimir Potaninan da KAF-hyvyönluadiifondat.
Melliččy-fondu terväh rubieu ruadamah uvves kohtas. Priäžäh perustetah yhteiskundu-neroloin rezidentsii. Nygöi uuzis tilois azetah remontua.
