Priäžäläzien ozutelmu – Pakkaine suurel pakkazel

Elämä-Priäžän piirin etnokul’tuurizen keskuksen karjalazeh paginkluubah käyjät rahvas ozutetah Pakkaine-suarnua Vieljärven kyläs. 6+ Kuva: Natalja Antonova

Karjalankieline paginkluubu ruadau Priäžäs kymmenen vuvven mail, toiči oli väliigi. Tänne kävväh Priäžän eläjät, kudamis suurin vuitti on piirin kylispäi tulluot rahvas. Tostu talvie kerholazet ruvettih harjaittamah uuttu kielineruo — lavaozutuksii. Ezmäine oli pandu mulloi, se on olluh “Podruugat” — Valentina Kondratjevan kerdomuksien mugah. Spektakli terväh painui mieleh Priäžän eläjile da se oli hyvä potkastus ajatella suamah uuttu.

Tänä talven kerholazet lavastettih ravien, nellänkymmenen minuutan kestäjän ozutuksen ven’an Morozko-suarnan mugah da pandih sille nimi “Pakkaine”. Ohjuajakse tuli Elämä-keskuksen ruadai Natalja Gladilina, kudai ei tiijä karjalan kieldy, hänele autettih kerholazet. Hyö ičegi kiännettih sanat. Enzi-illan piettih kodikyläs Priäžäs ihan uuttu vuottu vaste — se rodih hyvä luovu lahju paikallizile karjalazile.

Karjalazin silmin nähty tundiettu ven’an suarnu rodih uvvistettu da jumoristine, karjalazen mavunke.

Tuhukuun allus ozutustu tuodih Vieljärveh Karjalan Kielen Kodih. Pošti kolmenkymmenen gruadusin pakkassiäl rahvastu kerävyi täčöi täyzi zualu. “Lämmän muan” artistoi ezmäi juotettih hiilaval čuajul, a sit hyö nagratettih kaččojii suuren kodvan. Karjalazin silmin nähty tundiettu dai jo savoil kerroil ozutettu, ven’an suarnu rodih uvvistettu da jumoristine, karjalazen mavunke.

— Myö kui maltoimmo, iče kiännimmö ven’an kieles karjalakse. Toine toizele juohattelimmo sanoi, äijät kudamat unohtetut yön aigah mieleh tuldih,  sanelou Priäžän eläi, Lamminsellän kyläh kazvanuh Tatjana Korz’uk.

— Meidy täs on äijiä luaduu karjalastu: Vieljärveh, Heččulah, Pyhärvel, Kiinermäl da Kodžurih rodivunnuttu — net kai on Priäžän piiris. A vie on anuksenčuppulastu kotkatjärveläine. Nygöi piirikeskukses elämmö da paginkerhoh vai kävymmö, sie keskenäh suammo karjalakse paista.

Myö kui maltoimmo, iče kiännimmö ven’an kieles karjalakse. Toine toizele juohattelimmo sanoi, äijät kudamat unohtetut yön aigah mieleh tuldih.

Tatjana Korz’uk, Priäžän eläi

Uuzi ozutus toven rodih vuottamatoi. Suarnakkahat sovat da lavastukset täh niškoi luadi keskuksen ruadai, lyydinkarjalaine, Pyhärvel eläi Ol’ga Zaharova. Hänen ukkoh Vladimir meni myödäi da ozutti sulhazen roulin. Hyvän artistuneron ozutti Antonina Ruhtojeva, kudai ozutti Marfuušua ku suuspäi sylgi.

Kyläteatroin ozutukset on parahii taboi kuulta da paista karjalua, kerävyö yhteh. Net ollah suvaittavat ymbäri Karjalua, vai liijakse niidy meil et pane. Ohjuajien olemattomus da materjualan vähys ollah piälimäzii hädii.