Pohjolan luomua: šuunnitelma eistäy käsitöitä Karjalašša
Karjalan käsityöalan kehityššuunnitelma esitetäh Karjalan tašavallan kulttuuriministerijön kollegijan istunnošša kevyällä. Šuunnitelma valmistuu Etnokulttuurisien keškukšien ta järještöjen yhissyš ECHO:n projektissa. Projektin nimi on “Pohjolan luomua: paikallisien käsitöijen kehityškeinoja”. Še voitti Karjalan projektikilpailun.
– Kehityššuunnitelma on dokumentti, mi miärittelöy käsityön šäilyttämisen ta kehittämisen piäšuunnat Karjalašša. Šemmosen šuunnitelman olomaššaolo on tärkietä meijän tašavallalla. Še ohjuau käsityön harraštajie ta asientuntijie, kumpaset popularisoijah ta šäilytetäh Karjalan kulttuuriperintyö. Kehityššuunnitelman lisäkši tarvitah niise toimenpito-ohjelma, kertou ECHO-yhissykšen johtaja Svetlana Kol’čurina.
Projekti eistäy käsityöalan kehityštä Karjalan tašavallašša. ECHO:n omat ta ulkopuoliset spesialistit luajitah nyt käsityöalan kehityššuunnitelmua viijekši vuuvvekši. Šuunnitellah, jotta uutta šuunnitelmua aletah toteuttua jo tänä vuotena.
– Kaikki muuttuu nykyjäh vauhilla, šentäh tulovaisutta on erittäin vaikie ennuštua pitällä aikavälillä. Lakienluajintua uuvvissetah, uušie valtijollisie tukitoimie hyväkšytäh ta uušie käsityöalan työtapoja otetah käyttöh. Kehityššuunnitelmašša painotamma, jotta käsityöalan tulou varautua talouškriisin šeuraukših, lisyäy Svetlana Kol’čurina.
Ielliseššä vuosien 2010–2020 kehityššuunnitelmašša ei kiinitetty äijän huomijuo Internettih. Viime vuosina Internetin käyttö nousi ta verkkoteknologijat ruttoh kehitytäh. Šamalla on šyntyn uušie keinoja eistyä käsityötä, kehittyä tuottehie šekä tutkie markkinatilannehta.
Projektin ošana valmistuva opaš šisältäy opaššušainehistuo.
– Oppahašta käsityön harraštaja löytäy ičellä hyövyllistä tietuo. Šiinä kerrotah, mitein käsityöharraššukšešta voit kehittyö bisnessi. Oppahan tiijot autetah iče työnantajie ta yrittäjie mäneštymäh käsityöalalla, kuvittelou Svetlana Kol’čurina.
Opaškirja šisältäy ECHO-yhissykšen ruatajien luatimua ainehistuo ta viime vuosien koulutušohjelmie. Verkko-oppahah lat’atah niise uušie luventoja ta podkastija.
– Verkko-opaš käsityömuasteriloilla on hyvä ideja. Kouluttavien verkko-ohjelmien lisäkši on hyövyllistä järještyä henkilökohtasie tapuamisie käsityön harraštajien kera. Henkilökohtaista n’euvontua on šuunniteltu šamoin täššä projektissa.
Verkko-oppahašta tulou avonaini resurssi Karjalašša ta šen ulkopuolella eläjillä käsityömuasteriloilla.
