Yliopisto pyzyy aijan tazol
20. kezäkuudu Ven’al on algavunnuh se aigu, konzu otetah vastah dokumentoi niilöil, ket pyrgivytäh opastumah yliopistoloih.
— Tänä vuon Petroskoin yliopisto tariččou 1 471 ilmastu opastuskohtua bakalavroin programmas ja 139 magistroin liiniel. Vie 1 172 hengie opastuu maksus. Bakalavruprogrammas on 988 maksullistu opastuskohtua. Magistrakse maksus opastuu 184 hengie, kerdou Petroskoin yliopiston edustai Ol’ga Nasadkina.
Täl kerdua tarittavannu on läs 200 eri aloi koskijua opastusliiniedu, kudamis on seiččei uuttu.
— Uuttu bakalavruprogrammua on viizi. Net koskietah sobien dizainua, tiedokonehavustehien suunnitteluu, algukluasoin ja kerholoin opastajien valmistamistu da muantiijon ja biolougien sego fiiziekan ja hiimien opastajien valmistamistu, andau tieduo Respublika-uudizientoimisto.
Uudizientoimiston mugah kahtel uvvel magistruliiniel opastetah biznes- ja valdivofinansoin sego arktizen alovehen poliittizien protsessoin haldivoičendan spetsialistoikse.
Yliopistoh pyrgevyjes voibi ičel tuvva dokumentat libo työndiä net poštači da gosuslugi.ru -saitan kauti. Tiijot pyrgijöin miäräs da konkursan eistymizes lövvytäh yliopiston kodisivul. Ližäksi täs kezäs algajen tieduo konkursah nähte voibi suaja yliopiston telefonpalvelukeskukses.
— Telefonpalvelukeskuksen ruadajat ollah valmehet vastuamah kyzymyksih da auttamah pyrgijöi tarkastamah, ku dokumentat on täytetty oigieh, kerdou Ol’ga Nasadkina.
Vie yksi uudine on tarittu pyrgijöile: tieduo voibi suaja sežo MAX-palvelus toimijan chatbotan avul.
— Petroskoin yliopiston chatbot on 24/7-palvelu, kudai vastuau puaksuvimah kysyttävih kyzymyksih, kerdou opastusliinielois da mustoittau konkursan tärgevimis päivymäris, sanou Nasadkina.
Tänä vuon yliopastujien tutkindoloin tuloksien perustehel ilmazile opastustiloile pyrgijöil pidäy työndiä kai tarvittavat dokumentat heinykuun 25. päiväh suate. Ku yliopastujien tutkindoloin tuloksien perustehel pyrgii tahtou opastuo maksus, sit dokumentat pidäy työndiä elokuun 25. päiväh suate.
Myös on olemas pyrgijöin joukko, kudamal on oigevus piästä yliopistoh korgienškolan piettävien piäzytutkindoloin tuloksien perustehel. Moine oigevus on sanommo opistoloispäi valmistunnuzil.
— Täs vuvves siändölöih on tapahtunnuh tärgei muutos. Opistolois valmistunnuzil on oigevus piästä yliopistoh laitoksen valmistettuloin piäzytutkindoloin perustehel vai silloi, konzu hyö tahtotah jatkua opastustu samal alal opiston jälles. Toizii aloi koskijoile opastusliinieloile voibi piästä vai yliopastustutkindoloin tuloksien perustehel, kiinnittäy huomivuo Nasadkina.
Täs vuvves algajen yliopistoh pyrgijät voijah suaja ruadosobimukset vai tulijois ruatuttajis. Ruadosobimus tarkoittau, ku opastundan jälles spetsialistu tulou sentämän vuvven aijakse ruadoh sih laitokseh, kuduan kel häi solmi sobimuksen enne opastundua. Opastundas maksau tulii ruatuttai.
— Ruadosobimuksien kehoituksii löydyy Gosuslugi.ru- sekä Rabota v Rossii -saital, kerdou Petroskoin yliopiston valličuskomiissien edustai Ol’ga Nasadkina.
Karjalan ruavonhaldivon tiedoloin mugah parahite Rabota v Rossii on tarittavannu 330 ruadosobimustu.
— Ruadajii vuotetah inženieru-, opastus- ja tervehysaloil, kerdou haldivo omassah tiedottehes.
Yliopiston valličuskomiissii kyzyy pyrgijöi noudamah siändölöi ja täyttämäh dokumentoi huolellizesti.
— Hairahtustu rodieu joga vuottu pyrgijöin tiedoloih. Ližäkse äijät pyrgijät ei musteta, ku yliopistoh hyväksymine ei tapahtu automuattizesti. Se tapahtuu vai pyrgijän suostumukses, varaittau Nasadkina.
Yliopistoh hyväksytäh elokuus.
