“Omamualazet”: 20 vuottu yhtes
Omamualazet-kluubu Veškelykses täytti 20 vuottu. Kluubah kuulutah veškel’čät vahnembua polvie. Hyö kerävytäh Veškelys-etnokul’tuurukeskukseh kerran kuus. Tuhukuun vastavus omistettih Kanzoinvälizele muamankielen päiväle.
Omamualazet-kluuban pani alguh vuvvennu 2006 silloine Veškelyksen kyläkirjaston ruadai L’ubov Prisoškova. Sidä tiedy kluubalazet kerävytäh kerran kuus pagizemah karjalakse dai ven’akse. Joga vastavuksel vallitah mitahto teemu. Kluubua jo nelli vuottu pidäy kirjastonruadai Al’bina Kornilova.
— Rahvas kävväh, 25 hengie täs meile kerävyy. Myö ainos pagizemmo da pajatammo da čuajuu d’uommo, da piirua syömmö. Muga sit i aigu menöy. Kolme čuassuu myö täs istummo da olemmo kluubas, sanou Al’bina F’oudorovna.
Karjalan kieli da karjalazen kylän ennevahnalline elos piädykauti vallittih tuhukuun vastavuksen teemakse. Juuri tuhukuushäi pietäh Kanzoinvälisty muamankielen päiviä. Monil paginkluubalazil karjala on oma, muamansuus kuultu kieli. Dai Veškelys on vahnu karjalaine kylä.
— Pagizemmo nygöi d’o kui voimmo, yksikai himoittau vie pajista omal kielel. Himo on pajista, koishäi eule kenen kel pajista, dai lapset nygöi ei pajista, ni vahnembat, sanelou Al’bina Kornilova.
Joga vastavustu vaste kluubalazet suahah kodiruavokse kerätä tieduo da valmistua paginat vallitun teeman mugah. Kluubalaine Larisa Kulikovskaja saneli karjalazes kylys da karjalazis kylynkylbiendytavois. Valentina Popova ozutti da saneli, midä ennevahnallistu veššii, astettu da ruadobrujua on hänel kois da juohatti niilöin karjalazet nimet.
— Nämmä vešit meijän kois ainos oldih. Kai brujat. Buaban, pruabuaban, i minä kai peittoizeh panin, kos heidy jo ei rodivunnuh, eiga kavotah. Värtinäl vie ruan, pieksän, d’auhokorobu vie ainos d’auholoinke on. Komšu suuri, sie nygöi lapsien elot on, a muga i garbalot, mama pidi ainos, buolat pidi, ozutti omat kallehukset Valentina Popova.
Paginoin da pajoloin ližäkse kluubalazet varustettih pienet spektaklit karjalan kielel. Tuttavu ven’alaine Pyöräkkö-suarnu karjalakse oli ellendettävy ilmai kiännösty.
— Rahvahanke yhtes olla ylen vessel. Sit repetiiruičemmo, kaikenmostu spektaklii panemmo, sit nimipäivät kaikkien täs omat kerävymmö, sanou Omamulalazet-kluubah kuuluju Larisa Kulikovskaja.
Kluubah kuulujat naizet ollah nerokkahat emändät. A ku “Omamualazet” kerryttih parahite pyhälaskunedälil, sit stola oli täyzi kaikenmostu pastostu — oligo pyöröidy, oligo kalakurniekku da ruahto- da muarjupiiruadu, šipainiekkua, val’l’oidu, čupukkua — kuigi pidäy olla pruazniekkupäivänny.
“Omamualazet” varustettih kluuban uvven vastavuksen. Se pietäh tänäpäi, 12. kevätkuudu. Sit ruvetah pagizemah Suojärven čupun istouriedu. 0+
