Oma Media ta Karjalan Šanomat vietetäh vuosijuhlie
Monikielini kanšallini Oma Media -portali avattih luajalla yleisöllä 23. šyyškuuta 2020. Portali luajittih Venäjän kanšallisušaseijen virašton šekä Karjalan kanšallisen ta alovehellisen politiikan ministerijön kannatukšella. Resurssi yhistäy Karjalan kanšalliskielisie joukkoviestimie, kumpasie painau Periodika-kuštantamo.
— Viiješšä vuvvešša “Oma Media” valmisti yli 9 000 uutista ta yli 1 000 pitkyä kirjutušta karjalan, vepšän, šuomen ta venäjän kielellä. Uutisie kirjutetah Periodika-kuštantamon lehtien ta aikakaušlehtien ruatajat, kerto “Oman Median” piätoimittaja Mihail Nezvitskii.
Portali julkaisou uutisie ta kirjutukšie, kumpaset košetah tašavallan elämän eri aspektija: taloutta, kulttuurie, tevollisutta, muataloutta, sosialialua, erikoisšotaoperatijoh ošallistujien tukie ta opaššušta.
— Erikoista huomijuo Oma Media -portalin toimittajat kiinitetäh tilaisukših, kumpaset on šivottu perintehelliseh kulttuurih, kotimuan istorijah ta perintehellisih arvoloih. On tärkietä, jotta ainehistuo julkaissah šekä venäjän kielellä jotta Karjalan kantakanšojen kielillä, korošti “Periodikan” piäjohtaja Jevgenija Šustova.
Uutisien ta kirjutukšien lisäkši portali tariččou karjalan ta vepšän kielen kurššija, kumpaset autetah iččenäisešti opaštuo kanšallisie kielie.
— Šuunnitelmissa on jatkua karjalan ta vepšän online-kurššija. Nykyjäh ečimmä varua, jotta valmistua kurššien jatko-ošat. Lisäkši saitilla on luajittu Oma radio- ta Oma video -ošaštot. Lähitulovaisuošša avuamma ne ošaštot luajalla yleisöllä, šano Mihail Nezvitskii.
Šamoin Oma Media -saitilla on Karjalaisien, vepšäläisien ta šuomelaisien kielikeškukšen ošašto. Saitilla on internetti-kauppa, mistä voipi kaččuo ta oštua Periodikan uušie painokšie.
Vuotena 2024 portalissa vieraili 358 000 käyttäjyä ili noin tuhat käyttäjyä päiväššä. Tämän vuuvven kahekšan kuukauven aikana verkkošivulla on jo vieraillun yli 290 000 kävijyä ili noin 1 200 päiväššä.
— Tilaštošta näkyy, jotta portalin käyttäjämiärä kašvau. Kašvu antau meilä toivuo, jotta mänemmä oikieh šuuntah, korošti “Oman Median” piätoimittaja.
Šajekuun 5. päivänä 105-vuotisjuhlua viettäy Karjalan Sanomat -lehti.
— “Karjalan Sanomilla” viimeset viisi vuotta oltih tosi vaikiet. Koronan takie vuotena 2020 meijän ei onnistun pityä kaikkie šuunniteltuja tilaisukšie. Joutuma ruatamah verkošša. Ennein koronua toteuttima eri projektija lukijie varoin, esimerkiksi, matkoja Karjalua myöten, lukijaklubie, kielikeittijyö. Pandemijan aikana ne loputtih, mi huolettau meitä. Onnakko olemma opaštun ruatamah verkošša, kerto lehen piätoimittaja Mihail Nezvitskii.
Joka vuosi talvikuušša “Karjalan Sanomien” toimituš viettäy hyvänluajinta-aktijuo ta keryäy lahjoja lapšilla, kumpasilla on onkologisie tautija. A vuuvvešta 2022 ruatajat alettih kerätä humanitarista apuo erikoisšotaoperatijoh ošallistujilla.
Šamoin “Karjalan Sanomien” toimitušta huoletetah poštiošaštojen ruato, tilaušhintojen kašvu, lehen šuatavuš yläluokkalaisilla.
— Enšimmäisellä vuosipuoliskolla painošmiärä oli 455 kappalehta, a nyt on 440 kappalehta. PDF-versijon painošmiärä on 350. Meijän lukijien luvušša on šuomelaisie. On iloista tietyä, jotta hyö tykätäh meijän lehtie, šentäh kun še tariččou totista tietuo Karjalašta. Venäläisien lukijien luvušša on šuomen kielen pakasijie ta niitä, ket opaššutah kieltä, šano Mihail Jurjevič.
— Šuunnittelemma viettyä eri tilaisukšie 105-vuosijuhlakši, esimerkiksi, avoimien ovien päivie, pruasniekkua. Haluosima elvyttyä projektija lukijie varoin, ka še vuatiu raha- ta ihmisresurssija, kerto “Karjalan Šanomien” piätoimittaja.
