Naisklubi yhistäy pos’olkan aktiivisie eläjie
Viime netälillä piettih naisklubin jäšenien tavanmukani tapuamini. Še vietettih Kalevalan keškuškirjaššošša tunnukšella “Kirja on käsittämini, kunne šiirtyö ielläh”.
Yheššä piirikirjaššon ruatajien kera klubin ošanottajat, tällä kertua omien lapšien kera, tuttavuššuttih ammattija koškijih taitotevokših. Tämä teema kiinnošti ei ainuoštah aikuhisie, ka heijän lapšie niise.
Perezagruzka-naisklubin joka issunto vietetäh hyvin mukavašti. Tapuamiset yhtämieltäolijien kera košetah elämän eri aloja. Ativoih kalevalalaisien naisien luokše tullah enši kačahukšelta pos’olkan šamanmoiset eläjät. Ka heijän erikoisuona on še, jotta hyö piätettih avata oma yrityš ta tultih yksityisyrittäjiksi, čukelluttih ičentyöllistäjien muailmah.
Yksi šemmosista naisista-yrittäjistä on Jelena Kračkovskaja. Hiän jo monta vuotta ammatillisešti ruatau kosmetologijan alalla šekä luatiu hieronnan eri lajija.
Jelena šai liäketiijollisen koulutukšen ta 20 vuotta ruato piiripol’ničašša, a šiitä piätti avata oman yritykšen. Naini voitti kaikki vaikeukšet ta nyt mäneššykšellisešti ruatau omalla alalla.
Täštä Jelena Kračkovskaja kerto klubin yheššä issunnoista ta vietti oman kosmeettisen muasteri-opin.
A Julija Lettijevua oman yritykšen avuamisešša autto Kalevalan piirin kaaterikeškuš. Vuosi takaperin neičyt allakirjutti šopimukšen kaaterikeškukšen kera ta šai 100 tuhatta rupl’ua oman bisnessin kehittämiseh.
Julija ošti kaikki tarvittavat laittehet ta alko harjotella taftingie — luatie mattoja. Neičyt on luova ihmini ta hänen piäššä aina šyntyy uušie mukavie idejoja. Niin, Julija aktiivisešti alko ruatua. Hänen matot ollah melko šuosittuja, šentäh kun ollah kaunehet ta ainutluatuset.
Kaikešta täštä Julija Lettijeva iče kerto Perezagruzka-naisklubin jäšenillä ta vaštasi heijän kaikkih kyšymykših.
Kalevalan piirin sosialityön keškukšen johtaja Žanna Šamalujeva klubin yheššä issunnoista kerto keräytynyillä šiitä, mitein sosiališopimuš toimiu ta ken voipi luottua šen šuamiseh.
Kalevalan prihat ta neiččyöt Enšimmäisien liikkeheštä johtajah Tatjana Grigorjevnan kera niise tultih ativoih Perezagruzka-naisklubin jäšenien luokši. Hyö otettih ošua työpaikkojen jarmankkah, kummaista vietettih naisklubin toiminnan rajoissa.
Pojat ta tytöt kohta lopetetah koulu ta heijän ieššä noušou kyšymyš: kunne lähtie opaštumah ta ruatamah? Jarmankka tuli nuorilla šemmosekši matkaoppahakši, mistä hyö šuatih tietyä, mimmoset ammatit nyt ollah nykytärkiet ta tarvittavat meijän muašša.
Naisklubin järještäjät ta šen johtaja, Kalevalan piirin kaaterikeškukšen spesialisti Antonina Mosunova vaštuullisešti valmistauvutah klubin joka issuntoh. Vet “Perezagruzkan” piätarkotukšena on kerätä yhteh alotuškykyšie naisie, yhistyä heijät yhtehisillä mielenkiinnoilla, auttua heitä löytyä iččie tarpehellisešša hommašša, eikä jättyä heitä yksin missänä tapahukšešša, još tullou proplemoja.
Omien tehtävien kera Perezagruzka-naisklubi pärjyäy. Še varmah toimiu ta kuččuu omih rivilöih pos’olkan toisieki aktiivisie naisie.
