Midä paistah karjalazet
Karjalazien kerähmön edustajien vastavus piettih Karjalan tazavallan päivän hantuzis. Vastavukseh tulluot šeikuittih sidä, kui todevutetah Karjalan piämiehen käskylöi, kudamih nähte paginua oli tänä vuon tuhukuus pietys vastavukses. Nevvostolazet luajittih kahten vuvven aigah kerähmön jälles pietyn ruavon väliaigazii yhtehvedoloi.
Nevvostolazien istundoh piädyi Karjalan piämies Artur Parfenčikov. Händy vuottajes karjalazet piettih paginua Kanzallizen da alovehellizen poliitiekan varaministran Aleksandra Jeršovan kel. Pagin oli tärgielöis da huolestuttajies kyzymyksis. Toizien luvus nevvostolazii huolestuttau tazavallan lehtis painattavien karjalankielizien kirjutuksien julguandu, ku niidy painettas da painettas alalleh. Niilöi vie sanotah ”Karjalankielizet sivut”. Se huolestuttau Anuksen kirjaston ruadajua Tatjana Romanovua, kudai vastuau sit ruavos omas piiris.
Priäžän kanzallizen piirin edustai nevvostolaine Tatjana Izotova paheksi, ku Priäžän lohkon eläjil on suurii vaigevuksii guazulaittehiston palvelusobimuksii solmijes da sidä laittehistuo kohendajes. Spetsialistat kyläh ei kävvä, sobimuksii solmijes priäžäläzil tulou ajua Petroskoih, kus heidy otettih vastah enne kaksi päiviä nedälis, a nygöi vaigu nelli čuasuu illal ezmässargen.
Svetlana Loginova otti paginale ajelukset Suojärven lohkon kylien välis da kehoitti andua endine Veškelyksen kyly kylän tarbehih. Rakendus tarviččou suurdu remontua, sinne tahtottas sijoittua L’ubimaja Karelija -liiton rezidentsii. Järjestöl on suurdu kogemustu projektoin todevutandas da äijy ozutusvehkehty. L’ubimaja Karelija -liitto on Elokuu-etnofestivualin pidäi.
Kyzymysty da paginua oli äijy. Vastavukseh tulduu Artur Parfenčikov tervehti kaikkiii karjalakse — terveh teile. Se kerras pani paginan rattahile. Vastavukses paiči probliemoin sellittämisty oli paginua tulies ruavos karjalazien kul’tuuruperindön da histourien säilyttämizeh nähte.
Vastavukseh valmistujes nevvostolazet oldih valmehet ruadamah kyzymys-vastavus-muvvos, ga aijan vähyttyy se ei stuanivunnuh. Yhtelläh vastavus oli hyövylline da tärgei.
Artur Parfenčikov kehoitti vastavuo nevvostolazien kel vie kerran lähi aigua. Vastavuksen kohtakse oli kehoitettu Sändämän manasterin tilat. Hyvä kehoitus, ku vuodeh 2027 valmistujes, konzu ruvetah pidämäh karjalazien valattamizen 800-vuozipäiviä, tulou luadie vie ylen äijän sil taibalehel.
