Meil pajo eliä da ruadua avvuttau
Petrovskoin hora on Karjalan vahnimii pajojoukkoloi – se ruadau Kondupohjan piiris vuvves 1936 algajen. Tänävuon oraskuus Petrovskoin hora pidi Kondupohjas suuren konsertan, kudai omistettih pajojoukon 85-vuozipäiväle.
Horan perusti Ivan L’ovkin, nygöi horua ohjuau Julija Jer’omina. Petrovskoin horal on suuri repertuaru – enämbi 400 pajuo karjalakse da ven’akse.
– Merkipäiväkse myö uvvistimmo repertuaran. Pohjakse otimmo meijän alovehen pajot da Munjärvenlahten častuškoi. Ivan L’ovkin konzu rubei kirjuttamah pajoloi Munjärvenlahtes, ezmäi kirjutti ven’alazii pajoloi, sit karjalaziigi. Minun tuatto, Al’bert Kurašov – silloi häi oli horan soittajannu – kerran sanoi minule: ‟Jul’a, sinul nygöi on kerdynyh ruaduo 80 vuvvekse”. Muga äijy pajuo on, muheloittau Julija.
Horan repetitsiet pietäh Munjärvenlahten kul’tuurutalois. Horaniekat, kuduat eletäh Kendärves, tullah pajattamah omil mašinoil. Repetitsieloi pietäh kaksi-kolme kerdua nedälis. Nygöi horas on läs 20 hengie, on äijy nuordugi – horah kävyy školaniekkoi Kendärves da Munjärvenlahtespäi. Horah yhtynyöt školaniekat opastutah karjalua školas. Munjärvenlahtes on ainavo škola Kondupohjan piiris, kus opastetah karjalua urokoinnu. Kendärves karjalah opastutah ližäurokoinnu, opastajannu on Natalja Kruglova, kudai ei ammui yhtyi horah. Uvves opastunduvuvves repetitsieloin aigua Natalja Kruglova kaččou pidiä karjalan kielen lyhyzii urokkoi, ku horaniekat enämbän maltettas karjalakse.
– Mulloi Julija kiändyi minun puoleh da kyzyi abuu – pidi kuvata muuzikkuvideo Muzikualline Karjal -projektah niškoi. Tulin minä da minunke tuli nelli tyttyö, kuduat opastutah karjalan kieldy minul lapsien da nuorižon liitos. Avvutimmo, videon kuvaimmo, ga eliä horattah jo emmo voi. Hora on suuri pereh, vastavujes ainos sebäilemmökseh. Duumaičen, ku minul pidi tulla horah jo aijembi. Sendäh ku minä olen Ivan L’ovkinan suguu muaman puoles, saneli Natalja Kruglova.
Omua suvaičustu karjalazih pajoloih horaniekat siirretäh polves polveh. Sanommo, Vera Mihejeva kävyy repetitsieloih omien bunukoinke. Julija Jer’omina toiči ottau keral nellivuodizen Sofa-tyttären. Lapsil on mieldy myö pajattua vahnembien jyttyöh. Horas pajattaugi Zlata, Natalja Kruglovan tytär.
Petrovskoin hora puaksuh pidäy konsertoi lähäl olijas Martsial’noin parandolas. Karjalan gostile on mieldy myö kuulla karjalan kieldy da midägi tiijustua karjalazien kul’tuuras, sanommo, nähtä perindöllizet ruutat, kuduat horaniekat ommeltih iče. Pajattajat mielihyväl yhtytäh erilazih festivualiloih da kilboih. Kaksi vuottu tagaperin Petrovskoin hora kävyi festivualih Abhazien Gagrah, kus artistat roittih toizen tazon laureatoikse. Horaniekoil himoittas alalleh pidiä eri pruazniekkoi omas kyläsgi.
Sygyzyl artistoil on äijy konsertumatkua Kondupohjan piirin kylih dai Karjalan toizih čuppuloih. Ligakuus pajojoukko kaččou yhtyö Pajattau oma kylä -festivualih Petroskois. ‟Olis hyvä, ku olis oma avtoubussugi”, toivotah horaniekat. Pajattajil himoittau, ku horah tulis miehiigi, muga olis vesselembi pajattua.
