L’udmila Mehed: “Rupiemma auttamah Voittoh šuaten”
Kyšymä aktivistie Mehed L’udmilua, mintäh hiän harraštau volont’oritoimintua. Naisen vaštauš oli oikein helppo: “Šitä tahtou miun šielu, miun šytän rauhottuu šen avulla. Še on miun elämä, miun velvollisuš, miun šynnynmua”.
— L’udmila Lukjanovna, kerro, mitein šie tulin volont’oriksi?
— Mie olen šyntyn Karjalašša, täššä on miun pereh ta miun omahisien hautoja. Šitä ei šua pettyä! Autan omien voimien mukah. Kyllä, miula ei ole varoja oštua lentokonehta tahi tankkie. Ka šyyškuušta 2022 miun pieni apu mänöy rintamalla. Enšin tikutin lyhyitä šukkie ta tikutan vieläki šekä oššin prihoilla kaikkie tarvittavua – pikkupukšuja, šukkie, t-paitoja. Šiitä lähetin rahua Karjala – Krim -volont’oriryhmäh, a vuuvven 2024 heinäkuušša yheššä yštävien kera piätin omistah kerätä apuo ta lähettyä keräyšpisteheh. Yštävät kannatettih miut, ta myö keräsimä äijän tarvittavua. Šaima kiitollisutta prihoilta ta komentajilta, muun muašša videošša.
Šyyškuušta 2024 aloin työntyä henkilökohtasie lähetykšie yhen henken nimellä Hersonin, Zaporožjen ta Kup’anskin šuuntah. Keräsin omie yštävie Karjalan šielun lämpö -apučattih, ta rupesima joka kuukauši lähettämäh 12–15 poštipakettie.
— Mitein on järješšetty vapuaehtosien toiminta?
— Ruamma prihojen anomukšien mukah. Hyö kirjutetah, jotta tarvitah košteita pyyhimie ta heilä ei ole vettä, oššamma ta lähetämmä heilä. Još kerrotah, jotta kiirehešti tarvitah hirurkisie šormikkahie ta ičenlämpenijie täkkijä, myö oššamma ta työnnämmä. Šamoin lähetämmä makijaisie, mielittävie piirussukšie lapšilta, šuojeluesinehie, uuvvenvuuvven kuušie ta muita pienie lahjoja.
Huolekkahat ihmiset, miun tovelliset ta virtualiset tuttavat koko Venäjältä liityttih avun keryämiseh. Apu tulou Piiteristä, Permistä, Komin tašavallašta, Arhankelin alovehelta ta Karjalašta.
Miun yštävät aktiivisešti työnnetäh Ozonin ta Wildberriesin kautti, a mie šuan viivakoodin mukah, valokuvuan kaiken, pakkuan luatikkoih ta lähetän poštin kautti.
Kolme kuukautta myö aktiivisešti auttoma volont’orija Kurskista ta Belgorodista. Olemma työntän uušie kenkie, urheilupukšuja, t-paitoja, elintarvikkehie šotilaššairalua varoin.
Kaikkieh šyyškuušta alkuan lähettimä 122 poštipakettie meijän prihoilla rintamalla ta šairalah. Šäilytän kaikkie čekkijä ta taijan näyttyä niitä vaikka kenellä joukoštani.
— Tiijän, jotta volont’orit autetahko toini toisija. Mitein on šuoritettu volont’oriryhmien yhteistyö?
— Kaikki miun yštävät staraijah ta ruvetah auttamah meijän Voittoh šuaten. Mie olen Koštamukšen hopievolont’ori, toista vuotta peräkkäh mänen kutomah verkkoja. Aina tikutan lyhyitä šukkie. Erikoisšotaoperatijon kolmešša vuuvvešša olen tikuttan yli 170 parie. Meijän šotilahien jalkojen pitäy olla lämmöššä.
Šamoin löysin käsityömuasterija, oššin šukkalankoja, ta kolme henkie koko talven tikutti šukkie prihoilla.
Volont’oriryhmien yhteistyö ihaššuttau. Kiännyin Jessoilan eläjien puoleh villašukilla, ta hyö annettih miula tarvittava atressi.
Kiännyin Sortavalan kynttilätehtahan puoleh ta Mujejärven Rauhallisien naisšotilahien puoleh, ta hyö heti lähetettih miula ampumahautakynttilöitä meijän prihoja varoin.
Auttoma šuojärviläisie ompelijie kerätä rahua kankahah, a hyö pyynnöštäni työnnettih näkymättömie täkkijä meijän ryntyäjillä.
— Mitein vielä voipi auttua erikoisen šotaoperatijon ošallistujie?
— Kerran kyšyin ryntyäjiltä, mitä pitäy työntyä.
“Emmä tarviče mitänä, passipo. Auttakkua niitä, kenellä nyt on vaikieta”, hyö vaššattih.
A nuori priha ta tuatto Murmanskin alovehelta kirjutti, jotta hänellä oli kaikki, ka kyšy tikuttua šukat omalla vaštašyntynyöllä pojalla. Myö tikuttima kolme parie šukkie, oštima pukusen ta lähettimä lahjan Murmanskih.
Tuiskukuušša piti lähettyä auto rintamalla. Kiännyin Mujejärven piirin Tiikši-pos’olkan eläjien puoleh. Huolekkahat naiset kerättih 7 000 rupl’ua, ta šillä rahalla oštima prihoilla instrumenttišarjan.
Aktiivisešti auttau kuatunuon petroskoilaisen šankarin pereh. Hyö šanotah, jotta još hoti yksi priha lämpiey meijän lämmöllä ta jiäy eloh, še on onni. Vain yheššä voimma auttua voittua.
Šamoin kirjutan runoja erikoisšotaoperatijošta ta lähetän niitä rintamalla. Ilmešty lauluja volont’orien, erikoisšotaoperatijon, voiton aihiešta.
Yheššä yhštävien kera rupiemma auttamah meijän šankarie Voittoh šuaten!
