Kirjašto on paikka lukomisekši ta mukavakši ajanvietokši
Kalevalan piirin Borovoi-pos’olkašša avattih uuvvissettu kirjašto. Še tuli äijyä mukavammakši.
Kirjaštoh oli oššettu uuvvet huonehtarpehet, varuštehet, mukavie kirjoja lapšilla ta aikuhisilla. Muutokšie kirjaššošša oli luajittu Kulttuuri -kanšallisen projektin anšijošta. Šen toteuttamista johtau Karjalan piämieš Artur Parfenčikov.
Borovoi-pos’olkašša on äijän innokkahie lukijie ta kirjaššošša kävijie. Ihmiset luvetah klassista ta nykyaikaista kirjallisutta šekä karjalaisien kirjailijien tevokšie. Pos’olkašša on omie runoilijieki, kumpaset kirjutetah omašta rakkahuošta kotimuah ta šen kaunehuošta.
Uuvvistua kirjaššon tilat autto Kulttuuri-projekti. Nyt še on valosa ta kirkaš paikka, mistä voipi löytyä mukavua lukomista ta missä voipi harraštua luovua ruatuo, viettyä tilaisukšie, konserttija, järještyä näyttelyjä, muasteri-oppija, šeuruššella kaverien ta omahisien kera.
— Mallikirjašto on nykyaikani ta mukava ajanviettotila. Täššä lapšet ta aikuhiset voijah šeuruššella ta šuaha uušie tietoja. Kirjaššon fondih piäsi uušie kirjoja, niijen nimet ollah vuottamattomašti mukavat. Kirjaššošša on äijän stolapelijä. On oššettu niise tietokonehie, projektorija ta äšen VR-šilmälasit – ne annetah lisyä mahollisukšie kirjaššon vierahilla. Kirjašto on kaunis ta lapšet tykätäh valokuvata iččie, a valokuva kirjan kera on enšimmäini aškel lukomisekši. Nykyaikasešša kirjaššošša ei ole ikävä, šano kirjaššon johtaja Marina Karnauh.
Borovoin kirjaššošša käypi 740 henkie. Vuuvven aikana pietäh noin 50 tapahtumua. Kirjašto on monivuotisešša yhteisruavošša koulun, kulttuuritalon, urheilukoulun ta monitoimitalon kera.
Borovoin kirjaššon partn’orina on Karjalan Rahvahan liitto. Kanšalaisjärješšön toteuttaman projektin rajoissa kirjaššošša pietäh karjalan kielen ilmasie kurššija (12+).
Männyönä vuotena ne miellyttih kaikilla, tänä vuotena kaikin toivotetah, jotta kuršši tulou vielä mukavammakši. Šen vetäjä Tatjana Sidorova valmisti mukavan ohjelman.
— Tänä vuotena karjalan kielen kurššin tehtävänä on kuččuo nuorie kurššiloih. Tehtävä on vaikie, šentäh kun nyt kurššilla käyvväh yli 50-vuotiset naiset, kumpaset jo tiijetäh kieltä. Nuoriso karjalan kieltä ei tiijä. Mie pitälti ajattelin, kuin šuorittua tämä tehtävä ta ratkaisu ei löytyn heti. Tänä vuotena kirjaššošša kurššien ohjelman rajoissa myö piemmä tilaisukšien šarja “Karjalan kieli pelilöissä. Šukupolvien perimini.” Esimerkiksi, Pokrovan pruasniekka, stolapelit perehen kera, Uuvvella vuuvvella omissettu Taikojen pelto -peli, Kalevala-eepossašta peli. Kaikki pelit ta ohjelmat mie kekšin ičen näin, jotta šiih voitais ošallistuo lapšet ta aikuhiset. Miun apulaisina tänä vuotena on 9. luokan opaštujat. On oikein mukava, jotta kurššija pietäh uuvvissetušša kirjaššošša, kumpasešša on kaikki, mitä tarvičemma projektin toteuttamisekši: mukavat tilat, huonehtarpehet ta tekniikka. Entisinä jiähäh kirjaššon ruatajat ta heijän tahto auttua meitä, šano Borovoin keškikoulun venäjän kielen ta kirjallisuon opaštaja ta karjalan kielen kurššien vetäjä Tatjana Sidorova.
