Karjalan tašavallan ta Tverin alovehen yhteistyö kehittyy
Karjalaisien X kerähmön kynnykšellä Karjalan kanšojen yštävyštalošša vietettih pyorä stola Karjalan tašavallan ta Tverin alovehen yhteistyön kyšymykšistä.
Tilaisuon ošallistujie tervehittih Karjalan itämerenšuomelaisien kanšojen liiga -kanšalaisjärješšön johtaja Anna Anhimova, Karjalan tašavallan kanšallisen ta alovehellisen politiikan ministerijön kantakanšojen valtijollisen tuven ošaššon piällikkö Jelena Migunova.
— On iloista nähä partn’orija ta kollegoja Kielen, kirjallisuon ta istorijan instituutista, Periodika-kuštantamošta ta kanšalaisjärještölöistä. Myö äijän ruamma yheššä. On suali, jotta tänä vuotena ei tullun Nikolai Aleksandrovič Turičev. Juuri hiän alotti meijän yhteistyön. Vuotena 2017 tverinkarjalaiset kučuttih meitä konferenšših. Šen jälkeh Tverin alovehella vietettih Karjalan kulttuurin päivät, Kalitka-festivali, myö vajehtima delegatijoja, allakirjuttima šopimukšie, šano Jelena Migunova.
Jelena Ivanovna myönti Tverinkarjalaisien kanšallis-kultuurisen autonomijan entisellä johtajalla Nikolai Turičevilla Karjalan tašavallan piämiehen kunnivomerkin panokšešta Karjalan tašavallan kehitykšeh. Palkinnon otti vaštah järješšön nykyaikani johtaja Oleg Jevgrafov.
Pyörän stolan ošallistujat käsiteltih Karjalan ta Tverin alovehen yhteistyötä eri tašoilla, yhtehisie projektija, karjalan kielen tilannehta ta tulijan yhteistyön perspektiivijä.
— Kaikki alko vuotena 2020, konša myö enšimmäistä kertua tulima Karjalaisien kerähmöh. Nelläššä vuuvvešša šaima šuurta kokemušta eri yhtehisissä projektiloissa, eri aloilla. Karjalašša on ušeita ihmisie, kumpaset ošallissutah tverinkarjalaisien projektiloih. Lihoslavlin kaupunkipiirin hallinto ta Karjalan kanšallisen ta alovehellisen politiikan ministerijö kannatetah meitä. Ilman šitä tukie meilä ei ois šemmosie tulokšie. Meijän piäprojektina on Karjalaini talo - šen anšijošta šuamma granttirahua ta tienuamma turistibisnessin avulla. Rahua työnnämmä ruatoh ta alovehien kehitykšeh. Nellä vuotta takaperin tutuštuma Kielen, kirjallisuon ta istorijan instituuttih ta šaima tietyä, mi on tietoruato. Meilä še on tosi tärkie, šentäh kun haluomma kannattua perinnehtä. Šamoin, olemma kiitollisie Karjalan kanšojen yštävyštalolla – še näyttäy, mitein keškuštelou eri kanšojen etuštajie. “Periodikan” ruataja Ul’jana Tikkanen viime vuotena vietti karjalan kielen kurššija KODIMAILLA-forumissa, šentäh kun meilä ei riitä opaštajie. Ka kehitämmä omie kielitaitoja. Šamoin vuuvvešta 2015 keškuštelemma Nadežda Kalmikovan kera, meijän lapšet tultih yštäviksi, kerto tverinkarjalaisien projektien järještäjä Marina Jevgrafova.
Jelena Migunova ehotti, jotta Tverinkarjalaisien talo ta Karjalan Rahvahan Liitto allakirjutettais šopimuš yhteisruavošta.
Pyörä stola piettih Itämerenšuomelaisien kanšojen liigan Karjalan tašavallan piämiehen granttišiätijön kannattaman Šuomelais-ugrilaiset nuorisoreitit -projektin rajoissa.
