Karjalan Rahvahan Liitto vietti vuosikerähmön
Kevätkuun 29. päivänä Karjalan kanšojen yštävyštalošša Karjalan Rahvahan Liitto piti vuosikerähmön. Tilaisuošša käsiteltih järještön ruatuo kolmen vuuvven aikana, min jälkeh valittih johtaja ta johtokunta.
Kerähmön alušša keräytynyitä tervehti Karjalan tašavallan kanšallisen ta alovehellisen politiikan ministerijön kantakanšojen valtijollisen tuven ošašton piällikkö Jelena Migunova. Hiän korošti, jotta Anna Jakovlevan ruavon kolmen vuuvven aikana toteutettih ušeita projektija.
— Karjalan Rahvahan Liitton projektit ošallissuttih Karjalan tašavallan piämiehen granttišiätijön joka kilpailuh. Nyt kakši projektie ošallistuu Kulttuurialottehien presidenttišiätijön kilpailuh. Kohta šuamma tietyä tulokšista, šano Jelena Ivanovna.
KRL:n johtaja Anna Jakovleva kerto vuosien 2022–2025 piäšuavutukšista: projektien toteuttamisešta, eri tilaisukšien pitämisešta ta karjalaisen kulttuurin kehittämiseštä.
Kolmen vuuvven aikana Karjalan Rahvahan Liitto aktiivisešti toteutti projektija. Viimeni niistä, “Karjala henkilöissä: Istorija. Kieli. Kulttuuri” starttasi vuotena 2024 ta tänä vuotena šen toteuttamini jatkuu.
— Šulakuun 16. päivänä projektin rajoissa vietetäh luventoja Karjalan šakšalais-fašistisista valottajista vapauttamisen aihiešta. Kučumma kaikkija halukkahie Petrovskii-kulttuurikeškukšeh. Vuuvven 2025 tuiskukuušša starttasi Karjalaiset šuurešša isänmuallisešša šovašša -aktijo. Šen rajoissa keräsimä šovan vuosina Karjalašša otettuja valokuvie. Šulakuušša esitämmä mukavimpie valokuvamaterialija näyttelyššä Karjalan kanšojen yštävyštalošša, kerto Anna Jakovleva.
Galina Vasiljeva ta Valentina Libertsova esitettih KRL:n Jessoilan ta Aunukšen ošašton ruatuo.
— Meijän ruavon strategini linja koški valmistautumista X Karjalaisien kerähmöh. Vuuvven 2023 lopušša kirkkahimmakši tapahtumakši tuli kanšankirjailijan Aleksandr Volkovin 95-vuotisjuhlalla omissettu kirjallisuštapuamini. Še piettih Karjalan kanšallisešša kirjaštošša ta šiih ošallistu Jessoilan ošašto, omahisie ta yštävie Petroskoista. Viisi vuotta toimiu lapšien Jessoilan kulkuset -teatteri. Opaštajan Tamara Petrovna Sergejevan kera lapšet valmissetah spektaklija, innoššutah omin rooliloih, perintehih, tapoih. Karjalan Rahvahan Liitton Jessoilan ošašton 35-vuotisjuhlakši valmistima al’pomin, jotta kunnivoittua niitä ihmisie, ket omissettih omua elämyä kielen kehittämisellä ta tapahtumien pitämisellä, šaneli Galina Vasiljeva.
Šiitä KRL:n jäšenet valittih järještön johtaja ta johtokunta. Yksimielisen piätökšen mukah johtajakši uuvveštah tuli Anna Jakovleva. Johtokuntah liityttih Aleksandr Jeremejev, Valentina Libertsova, Valentina Mironova, Natalja Bogdanova, Dina Kanaševič ta Natalja Sinitskaja.
Oraškuun juhlapäivien kynnykšellä Oma Pajo -kuoron artistat ta kerähmön ošallistujat esitettih Voitonpäivä- ta Kat’uša -laulut karjalan kielellä. Tilaisuš loppu čäijynjuonnalla.
