Karjalan kieldy ilmai urokkoi

Alavozen školan lapset mielihyväl luajittih kuvii mustokse karjalan kielen nedälis. Kuva: Anna Popova / Alavozen školan vk-sivu

Alavozen školas karjalan kieli vähäzin eläy ilmai urokkoi. Muamankielen päivän aloh lapset juoksendeltih pertivälilöi myöte, lugiettih seinil riputettuloi tablikkoloi karjalazien sananpolvien da sananlaskuloinke, kuduat oldih kiännetty ven’akse. Pidi löydiä yksi hairahtus, kohendua se, tulla sanomah oigei variantu da suaha karjalan kielen opastajas Antonina Vladimirovnas lahjazet. Kaikis kirkiembät roittihes toizen kluasoin opastujat. Školan Mix-teatru varustau livvikse kiännettyy Kolme počinpoigua-suarnuspektaklii. Alalleh lapset ajellah Anuksen kanzallizeh muzeih, kus Svetlana Bel’anina opastuu iče dai harjaittau nuorii karjalan kieleh.

Päivän aloh lapset juoksendeltih pertivälilöi myöte, lugiettih seinil riputettuloi tablikkoloi karjalazien sananpolvien da sananlaskuloinke, kuduat oldih kiännetty ven’akse. Pidi löydiä yksi hairahtus, kohendua se.

Kevätkuul jo monii vuozii Alavozen školas pietäh Karjalan kielen da kul’tuuran nedäli, kuduah joga opastai varustau eriluaduzii urokkoi, kižoi, kilboi. Tänä vuon enzimäzikse algukluasoin da liikundukul’tuuran opastajat piettih “Karjalazet kižat”. Ennenvahnazet kižat “Hukku da jänöi”, “Kukit”, “Hyppy”, “Kalat da verko”, “Jaša” da toizet opastetah lapsii olemah kirkienny, viizahannu, tervehenny. Ehki oli vessel, lapset ei tahtottu lähtie sportuhuonuksespäi!

Kuvvenden kluasan opastujat yhtes opastajan Ilona Kasjanovanke tuttavuttih karjalazen säveldäjän Gennadii Vavilovan muuzikkah, kuunneltih pajoloi da toizii tevoksii, kačottih fil’man. A enzimäzen B-kluasan “kotkazielluo” tuli Ilomieli-kandelehjoukko, kuduan ohjuajannu Galina Potapova. Lapset tiijustettih vahnan karjalazen kandeleh-soittimen histourien, kuunneltih soitandua. A sit juattihes joukkoloih da opittih ičegi opastuo vähäzel soittamah kandelehil piendy Kimali-sävelmiä. Tämä muasteripaja ylen äijäl miellytti lapsii.

Ennenvahnazet kižat “Hukku da jänöi”, “Kukit”, “Hyppy”, “Kalat da verko”, “Jaša” da toizet opastetah lapsii olemah kirkienny, viizahannu, tervehenny. Ehki oli vessel, lapset ei tahtottu lähtie sportuhuonuksespäi.

Enzimäzele da toizele kluasoile, kuduat opastutah karjalan kieleh, opastai Antonina Rossijeva varusti kvestan “Meijän mua – Karjalu”, kuduas lapset mustoitettih Karjalan valdivollizet da kul'tuurusimvolat, piirustettih kortin rahvahallizen kirjoindehen mugah, tansittih perindöllizii karjalazii tansiloi da kižattih. On hyvä mieli, gu nedälin aloh školas kuuluttih karjalaine kieli da muuzikku.