Karjalaista kivie käytetäh Piiterissä
Karjalaista marmorua käytetäh Piiterissä šijoutujan Iisakinkirikön restauroinnissa. Pakina on Priäžän piirin Kovadjärvi-marmoraesiintymäštä louhitušta marmorašta.
— Muistomerkkien šuojelukomitietan etuštajat järješšettih Kovadjärven marmoran laboratorijatutkimukšet. Ne näytettih, jotta marmora šopiu käyttöh restaurointitöissä, Respublika-uutistoimisto lainuau Iisakinkirikön restauroinnista vaštuajan varajohtajan Gennadii Poluninin šanoja.
Karjalaisen marmoran mahollisešta käytöštä Iisakinkirikön restauroinnista keškuššeltiin kešäkuušša 2025 Piiterin kanšainväliseššä taloušforumissa.
— Restauroinnissa täytyy šäilyttyä istorijallini tarkkuš. Karjalaini kivi on täššä šuhtehešša korvuamatoin, Karjalan piämieš Artur Parfenčikov kirjutti omalla VK-šivulla.
Iisakinkirikön etuštajien mukah karjalaista kivie ei ole valittu šattumalta.
— 1800-luvulla kirikön rakentamisešša käytettih Ruskealašta louhittuo marmorua. Luonnollisien ta teknisien ominaisukšien ošalta Kovadjärven marmora on šamankaltani kuin Ruskealan kivi, kerrottih toimitukšella Iisakinkiriköštä.
Kovadjärveštä louhitah eriväristä marmorua.
— Karjalašta löytyy esimerkiksi harmuata ta šavunväristä šekä ruušuista marmorua. Lisäkši karjalaini kivi šopiu erinomasešti arhitektonisien elementtien luomiseh. Näijen kaikkien ominaisukšien anšijošta karjalaista kivie valittih käytettäväkši restauroinnissa, ilmotettih kiriköštä.
Iisakinkirikön entisöinti alko vuotena 2024. Še tapahtuu muutomašša vaihiešša. Šuunnitelmien mukah Kovadjärven marmorua käytetäh Iisakinkirikön restauroinnin toisešša vaihiešša, mi alkau tänä vuotena.
— Kivie käytetäh kirikön julkišivun elementtien restauroinnissa. Karjalaini marmora on erittäin keštävä ta šopiu käytettäväkši Piiterin ilmaštošša, Iisakinkirikön lehistöpalvelu kerto.
Iisakinkirikkö on Piiterin tunnetuimpie nähtävykšie. Kirikön rakentamini kešti 40 vuotta 1818—1858. Ruskealan marmoran lisäkši rakentamisešša käytettih Karjalan Tiudijašša louhittuo marmorua šekä Šokšušša louhittuo kvartsiittie.
— Muijen karjalaisien kivilajien käyttyö Iisakinkirikön entisöinnissä ei tällä hetkellä šuunnitella, kommentoi lehistöpalvelu.
Kovadjärven marmora kiinnoštau ulkomualaisie
Marmoran louhinta Kovadjärvi-marmoraesiintymäššä on alkan tänä vuotena. Kivie louhiu Prionežskaja gornaja kompanija -kaivošyrityš.
Yritykšen johtajan Sem’on Sičovin mukah karjalaini kivi kiinnoštau mahollisie kotimaisie ta ulkomaisie oštajie.
— Yrityš on vašta alottan toiminnan, ka restauroijat ta metron rakentajat šanot tih, jotta tahotah käyttyä tätä marmorua työššä. Kivi kiinnoštau niise spesialistija Valko-Venäjältä, Armenijašta ta Azerbaidžaništa, Sičov kerto Karjalan piämiehellä Artur Parfenčikovilla.
Marmoraesiintymä šijoutuu noin šeiččemän kilometrin piäššä Priäžän piirin Kolatselän kyläštä. Kivie meinatah tuuvva jaloššukšeh Pitkärannan piirih. Respublika-uutistoimiston mukah kiven- ja loššušyrityš käynnistyy enši vuotena.
— Yrityš tulou jaloštamah 100 000 kuutijometrie kivie vuuvvešša, uutistoimisto tiijottau.
