Karjalaisista karjalaksi
Kalevalan Uutiset -lehen Šana karjalaisilla -šivulta löytyy erilaisie aiheita. Niijen joukošša on Voiton 80-vuotispäivällä omissettuja materialija šekä artikkelija Kalevalašta kotosin olijista partisaniloista ta partijolaisista.
— Lisäkši julkaisamma juttuja Kalevalan piirin istorijašta. Šivuilta löytyy I. K. Inhan Kalevalan laulumailta -kirjan karjalannokšie ta ihmisien muisselmie. Valičemma šivulla mielenkiintosie aiheita. Niise painamma Kipinä-kuvalehen ta Taival-almanakan kačahukšie, kertou “Kalevalan Uutisien” piätoimittaja Sergei Kondratjev.
— Karjalaisilla šivuilla kerromma erilaisista tapahtumista, ka huomijošša tietyšti on karjalaisie aiheita ta karjalaisien elämä, šanelou Šana karjalaisilla -šivun toimittaja Raisa Remšujeva.
Nellän viime kuukauven aikana karjalaisilla šivuilla julkaistih Vilho Kivisalon Elävä muisto -nimini teksti. Kivisalo eläy nyt Šuomešša. Hiän on šyntysin entiseštä Koštamuš-nimiseštä kyläštä. Omašša tekstissä vienankarjalaini mieš esittäy muisselmie lapšuošta, elämäštä Kylmäsenvuarašša, vanhašta Koštamukšešta, kylän arkiloista rauhan oloissa ta šovan kynnykšellä.
Raisa Remšujevan mukah eräš Kalevalan eläjä L’ubov’ Tarasova on šuorittan yhteistyötä lehen parissa.
— Kanšallisuoltah naini on karjalaini ta hiän šuattau kirjuttua karjalakši. Joškuš hiän lähettäy omie juttuja lehteh, kertou toimittaja.
Raisa Remšujeva ruatau “Kalevalan Uutisissa” noin viisi vuotta. Hiän kirjuttau, kiäntäy ta tarkistau karjalankielisie tekstijä.
— Erähänä päivänä Sergei Kondratjev otti yhteyttä miuh ta ehotti yhteistyötä. Šuoššuin heti. Mie olen šyntyn Kalevalan piirin Tollonjovešša ta pakajan vienankarjalua muamonkielenä. Ajattelen, jotta karjalankieliset tiijotušvälinehet autetah meitä šäilyttyä kieltä šekä karjalaista kulttuurie, on varma Raisa Remšujeva.
Sergei Kondratjevin mukah “Kalevalan Uutiset” šuau lukijilta myönteisie arvošteluja.
— Aikasemmin Vuokkiniemen ta Koštamukšen eläjät rikeneh käytih Kalevalašša oštamašša lehtie, missä oli karjalaisie šivuja. Nyt lehtie on mahollista lukie šähkösešti internetissä, kertou hiän piätoimittaja.
“Kalevalan Uutisilla” on 6 465 paperilehen tiluajua ta heijän määrä kašvau.
— Meijän lukijat eletäh kuin Karjalašša, niin ni Venäjällä ta muan ulkopuolella, šenelou Sergei Väinövič.
— Lehti painetah Kalevalan piirissä ta šitä myyvväh vain šielä. Miun čikko eläy Kalevalašša. Hiän oštau lehen monta kappalehta ta lähettäy ne Vuokkiniemeššä eläjillä heimolaisilla, kertou Raisa Remšujeva.
Juttuja vienankarjalan murtehella alettih julkaissa leheššä vuuvven 2015 pakkaiskuušta alkuan. Enšimmäisellä šivulla oli Valentina Saburovan vienankarjalaisie runoja, mi herätti lukijien šuurta mielenkiintuo karjalan kieleh.
Ajatuš karjalalaisista šivuista šynty Karjalan kanšallisen ta alovehellisen politiikan ministerijöššä.
— Entini Kalevalan piirin johtaja Gennadii Filippov šai kirjasen ministerijöltä. Kirjasen mukah Karjalan kanšallisissa piirilöissä julkaistavissa šanomalehtilöissä pitäy kertuo poliittisista, talouvellisista, sosialisista ta kulttuurisista aseista karjalan kielellä, kertou Sergei Kondratjev.
— Karjalaisien šivujen painamiseh varattih rahua. Lisäkši käsiteltih šivujen valmisteluo ta niijen taiton erityispiirtehie, löyvettih toimittajie ta oikolukijie, keškuššeltih aiheista, lisyäy hiän.
Nyt Šana karjalaisilla -šivu on oša “Kalevalan Uutisien” šisältyö, mi tariččou karjalaisilla ta kieltä lukijilla mielenkiintosie juttuja.
