Kanzalliskieline toimitus tuaste on palkittu
Ol’ga Ogneval tämä on jo kaheksas palkindo Ven’an kuldaine rengas-mediafourumas. Kolme kerdua häi oli parahien joukos Paras video da fotoblog-matku Jaroslavl’an alovehtu myö -nominantsies. Kuva: Julija Sedova
Kanzalliskieline toimitus tuaste on suannuh palkindon Ven’an kuldaine rengas-mediafourumas. Sidä jo yheksäs kerdu piettih Jaroslavl’as. Pido keräi yhteh parahii žurnalistoi kogo Ven’alpäi, kuduat työttih kilbah omat fil’mat da TV-programmat.
Ven’an kuldaine rengas -fourumua pietäh vuvves 2018 algajen. Tänävuon mediakilbah oli työtty 285 ruaduo Ven’an 64 alovehespäi. Niilöis vallittih 30 parastu kymmenes nominatsies.
Meijän Karjalan TV:n toimittajan Ol’ga Ognevan s’užiettu kalafestivualis Kižin suarel piäzi kolmandele sijale nominatsies, kudamas sanellah eri kanzoin syömizis da käziruadomuasterilois. Sen s’užietan Ol’ga azui yhtes kuvuajan Vitalii Paltininanke. Leikkai sen da keräi yhteh iänitysohjuaju Dmitrii Hambir.
Tämä on jo kuvves Kanzalliskielizen toimituksen palkindo.
— Nämmä fourumat ollah hyvät, gu voibi nähtä kui toizet ruatah, paista eri ruadošeikkois, midä uuttu on. Olen jo viizi kerdua käynnyh sih fourumah, ainos on hyvä mieles nähtä omii ruadodovariššoi. Toizekse, sie on hyvä programmu, kus voibi kaččuo paikallizii nähtävyksii. Jaroslavl’u on ylen vahnu vuvvennu 1010 perustettu linnu, sie on midä kačottavua. Tädä mediafourumua pietäh juuri sikse, gu rahvas ymbäri Ven’ua tiijustettas, gu on midä kačottavua meijän muan eri kolkis. Tälleh livutetah oman muan turizmua, gu myö enämbän tiedäzimmö omii čuppuzii. Meil, žurnalistoil, tämä fourumu on hyvä mahto sanella da ozuttua omien kodikonduloin čomimii kohtii, sanoi kanzallalliskielizen toimituksen TV:n toimittai Ol’ga Ogneva.
Kalafestivuali Kižin suarel on jogavuodine suuri Karjalan kandurahvahien pruazniekku, kuduadu tänävuon piettih jo viijes kerdu. Se oli azuttu Kalastajan päivän nimeh da oli omistettu kalan pyvvändyperindölöile, kalastusneroloile, kalasyömizile da pastoksile.
— Kalafestivuali piettih Kižin valgamos. Sinne kerävyi ylen äijy rahvastu, oldih Jyškyjärven karjalazetgi. Ket keitettih kalarokkua, ket kurniekkua pastettih. Päivy oli ylen hyvä, poudu da räkki. Passibo suuri kuvuajale Vitaliele. Ehtimmö yhtes kohtas toizeh. Kus keitetäh, kus kižatah kilah, kus venehii vahnoi ozutellah. Oli ylen kiirehelline, pidi ehtie joga kohtah kuvuamah, gu puuttus azuo moine s’užiettu, kudai ozuttas kogo pruazniekan. Joga kerdua festivualin aigah on kalarokankeittäjien kilbu, i jogahine sih yhtynyh ozuttau, kui hänen kyläs, kui hänen perehes sidä kalarokkua keitettih. Se enne kaikkie on pruazniekku, kus suau pidiä hengis da jatkua hyvii taboi da perindölöi, saneli ruadomatkas Kižin suarele Ol’ga Ogneva.
Ven’an kuldaine rengas -mediafourumah yhtyi piäjohtajan sijahine -VGTRK departuamentan alovehelline johtai Rifat Sabitovgi. Hänen sanoin mugah, nämis vuozis fourumu rodih suurekse kiistumielivaihton ploššadkakse, kus pietäh paginua ei vaigu žurnalistiekan probliemois, ga hengellizien da morualizien arvoloin säilytändäs. Kai kilbah työtyt ruavot ollah täytetty elävil tundoloil da eläväl sanal. Sidä sanua ei sua vaihtua keinolluajitun intellektan sanah. Myö hyvittelemmo meijän ruadodovariššoi korgien palkindonke da toivotammo heile uuttu suavutustu da mieldykiinittäjiä programmua.
