Häi sanal rahvahas sytytti tulen
Meijän omamualaine mies on yksi ezmäzis, ken rubei kirjuttamah runoloi da kerdomuksii karjalan kielen livvin murdehel. Runoilijale muamankieli oli armas omuttu. Vladimir Jegorovič ozutti karjalan kielen taidovoindat da kaikel väil puolisti muamankieldy.
Syvyskuun 4.päivänny Anuksen kanzalline kirjasto pidi XXVI Vladimir Brendojevan nimillisty karjalazen literatuuran Täs synnyinrannan minun algu -festivualin jälgipäiviä. Sen nimi oli “Häi sanal rahvahas sytytti tulen”. Se on tottu, gu hänen jälles Anuksen piiris da kogo Karjalas rahvas kiännyttih muamankieleh da liženi karjalankielisty runoilijua da kirjuttajua.
Kui ennegi festivualin jälgipäivän avuamizet piettih koilluo, kus jälgivuvvet eli runoilii. Tervehdyssanat sanoi Anuksen piirin piämies Vadim Murii, Karjalan zakonoinhyväksyndykerähmön deputuattu Art’om Val’uk, Anuksen liygiläzet -liiton piälikkö Vladimir Lukin da Anuksen kirjastosistieman johtai Georgii Černobrovkin.
Jälles avuamizii rahvas ajeltih Kuunilan kalmužimale Vladimir Brendojevan kalmoile.
Festivualin päivän aloh Anuksenlinnan laitoksis oli pietty erilastu piduo. Sotsiualukeskukses hoijettavile Ilomieli-joukko (johtai Galina Potapova) soitti kandelehil da toizil rahvahallizil soittimil, školas n:u 2 oli pietty vastavus Oma pajo -horanke (johtai Tatjana Zaitseva), kudaman aigua lapset kižattih, lugiettih runoloi da paistih livvikse. Sordavalan koulledžan Anuksen ozastos opastujienke vastavui Kanzallizen teatran ozuttelii Nikita Anisimov. Tämä nuori mies kirjuttau muuzikkua Vladimir Brendojevan runoloih da iče pajattau pajoloi. Häi myös on Tapio-joukon da Lindu-muuzikkufestivualin johtajannu. Nuorižo hyväl mielel kuundeli pajoloi muamankielel gituaran soitandan mugah.
Sil aigua Anuksen lapsien kirjastos Karjalaine komšaine -kodialovehkluuban ozanottajile oli pietty Vladimir Brendojevan hyvä nimi -kodialovehčuassu. Lapsile saneltih runoilijan elaijas da runotuottehes.
Myös festivualin ozanottajat käydih Anuksenlinnan taidoškolah kaččomah nuoren neidizen Jekaterina Terentjevan kuvii. Tämän nuoren taidoilijan ozuttelu “Minun pieni roindumua” oli avattu elokuul. Jekaterina saneli, kudamis hierulois häi oli da mittumii taidotehniekkoi käytti kuvii piirustajes.
Jälles taidoškolua kaikin mendih Anuksen kanzallizeh muzeih. Sie oli pietty Uinotuspajo poijale -ozuttelu. Svetlana Bel’anina mieldykiinnittäjen saneli runoilijan yhtes runozes, kudai on omistettu lapsele. Ozuttelus sai kuulta, kui karjalazien taba pajattua omile lapsile avavuu ennevahnallizis kodikäyttövehkehis. Sen jälles Eloksen ratas -muzeinteatru ozutti Nuoru-ozutelman Anatolii Jeroškinan kerdomuksen mugah. Sen aigua zualas kuului nagro, ozutelmu toi ihastustu rahvahale.
Jälles kaikin kerävyttih Anuksen kanzallizes kirjastos Häi sanal rahvahas sytytti tulen-literatuurupidoh. Kodialovehen ozaston ruadajat Tatjana Romanova da L’udmila Blinkova musteltih Vladimir Brendojevan jatkajii, kuduat luajittih suuren panoksen karjalazen literatuuran, kielen, tavoin da kul’tuuran säilyttämizeh da kehittämizeh.
Vastavuksen avai Anuksenlinnan ližäopastuskeskuksen lapsien Domisol’-joukko (johtai Irina Stappijeva). Pivon aloh hyväl sanal musteltih festivualin innostajua da kuhkuttajua Galina Fedulovua, lugiettih hänen syväindykoskijoi runoloi. A Oma pajo -hora pajatti pajon“Otan paltinan”, runon kudamah kirjutti Galina Mihailovna.
Vastavustu čomendettih Karjalan koivu-, Kiuruine-, Kummažet-pajojoukot, soittajien Ilomieli-joukko, Alavoizen taigin -teatrustuudii da gost’at Petroskoispäi — Oma pajo -hora da Nikita Anisimov.
Pivon lopus Jelena Migunova andoi Kanzallizen da alovehellizen poliitiekan ministerstvan kiitändykirjazet Kummažet-pajojoukole, Ilomielen soittajile da Alavoizen taigin -teatrustuudiele.
Alla Sidorova andoi Anuksen piirin haldivon kiitändykirjazet omapajolazile da Nikita Anisimovale.
Omas ičes da Anuksen kanzallizen kirjaston nimes tahton sanuo suuret passibot kaikile meijän auttajile: Kanzallizen da alovehellizen poliitiekan ministerstvale, Anuksenlinnan haldivole, kirjaston ruadodovarišoile da meijän ystävile — karjalan kielen kannatajile, gu ainos oletto meijän rinnal! Teijän avul Vladimir Brendojevan suuri ruado — karjalan kielen säilyttämine da kehittämine jatkuu iellehgi. Meilehäi ”kieli eule turkikse, ga toiči äijäl lämmittäy”.
