“EtnoPRO” toi uušie idejoja
Elokuun 9.–12. päivinä Petroskoissa vietettih EtnoPRO-nuorisoissunto. Šiih tuli yli 30 nuorta ihmistä Karjalan eri piirilöistä ta Tverin alovehelta. Issunnon rajoissa toimi kolme sektijuo.
― Käsityöammatti luovan talouven sektorina -sektijon juohattajana on Svetlana Kol’čurina. Hiän opaštuu šujuvašti ruatamah käsityöammattien alalla. Kolmaš tila – talon ta ruavon välillä -sektijon rajoissa Jekaterina Jefremova kertou, mitein kehittyä pienie alovehie ta peruštua pisyvie julkisie tiloja. Musejo on tila jokahisella -sektijon juohattaja Anna Anhimova käsittelöy musejo- ta volont’oritoimintua šekä nykyaikaisen ta mielenkiintosen musejotilan luatimista, kerto avajaisissa Karjalan tašavallan kanšallisen ta alovehellisen politiikan ministerijön spesialisti, issunnon kurattori Aleksandra Anufrijeva.
Tverin karjalaini Sofija Jevgrafova tuli Petroskoih Čaškovo-kyläštä.
― Olen Tverinkarjalaisien kanšallis-kulttuurini autonomija -kanšalaisjärješšön aktivisti, Karjalaini talo Čaškovošša -projektin volont’ori. Omalla Telegram-kanavalla kerron tverinkarjalaisien ta oman perehen elämäštä. Yli vuosi opaššun šoittamah kantelella. Mie olen šeurallini, alotuškykyni ta vesselä. Olen ihanan joukon oša ta šujuva järještäjä. Milma innoššuttau yhtevyš šuomelais-urgilaisien aktivistien kera, omien kantatuattojen kulttuurien kehittämini šekä voimakaš ta alotuškykyni joukko, kumpasen kera voipi luatie vaikka mitä. Issunnošša haluon tutuštuo aktivistiloih, vaihtua kokemušta, šuaha tietoja, šano Sofija.
Margarita Krakuleva ruatau Šuojärven kirjaššošša šekä kulttuuri- ta joutoaikakeškukšešša. Hiän järještäy ušeita joukkotilaisukšie eri-ikäsillä ihmisillä, muun muašša kotišeutuopin ta kulttuurin aihiešta.
― Tulin täyventymäh energijalla ta innoštumah uušien tilaisukšien pitämiseh. Tahon šuaha tietyä uušista projektiloista ta voit olla ošallistuo niih, korošti Margarita.
Ošallistujilla valmissettih rikaš kulttuuriohjelma, luventoja, väittelyjä, muasteri-oppija ta tapuamisie mukavien ihmisien kera. Viimesenä päivänä Priäžän Art-Selo -tilašša nuoret esitettih omie valmistimie projektija.
― Meijän ryhmäššä on kolme henkie. Meijän projektin tarkotukšena on luatie hyvie oloja, jotta harraštajat opaššuttais šoittamah kantelella. Šitä varoin vuuvven aikana piemmä matkoja ta tietošivissyštä. Tulokšena on kanšallisen šoittimen popularisointi. Tiijän, jotta tänä vuotena monilla tverinkarjalaisilla kantelenšoitto tuli kuulusakši Karjalaisen etnoforumin jälkeh. Tuli šelväkši, jotta monet aikuhiset kiinnoššutah šiitä, ka ei tiijetä, missä ta mitein voipi opaštuo. Meijän projekti voipi auttua heitä opaštuo šoittamah šekä kehittyä yhtevykšie alottajien kantelistien kera Vienan Karjalašta ta Petroskoissa, šelitti Sofija Jevgrafova.
― Meijän projektin nimi on “PROsuveniiri”. Šiih kuuluu karjalaisien suveniirien merkki, kumpani rupieu peruštumah Karjalan kulttuurin ta istorijan šäilyttämiseh ta popularisointih, kerto Margarita Krakuleva.
EtnoPRO -nuorisoissunnon järještäjinä ollah Karjalan tašavallan kanšallisen ta alovehellisen politiikan ministerijö ta Periodika-kuštantamo.
