Brendojevan vuozi on algavunnuh
Anuksen kanzallizes piiris piämiehen Murii Vladimiran käskyl 2026 vuozi on ilmoitettu kuulužan kirjuttajan, runoilijan, kiändäjän da karjalan kielen livvinmurdehen kannattajan Vladimir Brendojevan vuvvekse. Karjalan Rahvahan Liiton Alavozen ozastoh kuulujat Alavoizen taigin -teatrustuudii da rahvahalline Kummazet-pajojoukko kerras piätettih se pidiä mual, kuduadu myö kirjuttai erähiči käveli.
Kirjaston johtai Natalja Mitrofanova kannatti tämän kehoituksen da enzimäzikse varusti hyvän kniigu- da lehtiozuttelun, kuduadu čomendau meijän nerokkahan taidoilijan Anna Mitrofanovan luajittu runoilijan kuva.
Pivon algoi Alavozen kylän haldivon piälikkö Natalja Arhipova. Kul’tuurutaloin johtai Ol’ga Bogdanova saneli, mittuot tapahtumat roitah täna vuon. Karjalan Rahvahan Liiton Alavozen ozaston ruadoloi kerdoi Valentina Libertsova. Vladimir Brendojevan elaigua da tuotanduo ylen tarkah da čomah luaduh ezitti Tatjana Romanova, rahvas mielihyväl kuunneltih runoilijan sulavua iändy.
Vie enämbäl sydämellizet välit avai nuorien kandelehel soittajien Iloine- joukko opastajan Galina Potapovanke. Vladimir Jegorovič oli ylen nerokas muuzikkah niškoi, soitti mandoliinal da soitol, kirjutti da kiändi äijän pajuo. Hänen sanoih luajitut pajot “Smiettizin vai kuldoi tulou” da “Petties”, kuduat pajatti Zoja Nazarova, kyynälissäh liikutettih mieldy. Kummazet-pajojoukko varusti ylen kaunehet livvinkielizet pajot, kuduat čomendettih pruazniekan.
Ven’an kanzoin yhtevyön vuvvel suau toven ellendiä, ku kielien da rahvahan kanzoin tulii oza on kiini nuoris. Sit kaikin ylen tarkasti kuunneltih, kui lugietah Vladimir Brendojevan runoloi Alavozen školas opastujat Darja Rodionova, Ivan Filimonenko, Art’om Rossijev. Varusti heidy Antonina Rossijeva. Häigi kučui pidoh karjalan kielen kursuniekkoi, ku on heijän opastajannu. Ilona Kasjanova tuli omien 10. kluasan opastujienke, kuduat hyväs mieles kačottih ezityksii.
Onnuako kaikis vuotettavimannu da mieldykiinnittävimänny roidih se, gu lövvyttih da tuldih pidoh net ristittyöt, kudamil lykysti nähtä Vladimir Jegorovičua. L’udmila Aleksandrovna Gerasimova kerdoi, kui vedeli miesty Planeta-hevol čomendetus ries kellozienke poikki kyläs zavodan syöndytaloihsen jälles, konzu kirjuttai sai Jalmari Virtazen literatuurupalkindon. Vuvvennu 1988 Alavozen souhozan silloine johtai Aleksandr Titov yhtes tazavallan Kniga-liitonke perustettih sen Virtazen literatuurupalkindon.
Enzimäzekse laureatakse piätettih panna Vladimir Brendojev. Paiči paginoi vie kačoimmo čoman videon, kuduas Jevgenija Andrejevna Digujeva lugou Brendojevan Ladoga-runon. Valentina Rozentals saneli palkindoloih nähte, ku jälles Anuksen piiris ruvettih pidämäh Täs synnynrannan minun algu -festivualii da andamah Vladimir Brendojevan nimisty palkinduo, kaksi meijän kylän livvikse kirjuttajua suadih sen.
Vladimir Brendojevan vuozi avavui hengellizesti da kodikkahasti. Hyviä jatkuo!
