Artur Parfenčikov: “Rupiemma ruatamah Kemin eläjien hyväkši”
Enšimmäini neuvottelu oli omissettu Kemin piirin sosialitalouvellisella kehitykšellä. Piäaiheina oltih infrastruktuurin kehityš, korjauškelvottomat talot ta talouš.
Viime vuotena Kemin piirin piäkapitalih investoitih melkein 400 miljonie rupl’ua. Šamoin pienen liikehtoiminnan subjektien ta ičeyrittäjien miärä kašvo 15 %.
Viijen vuuvven aikana šuunnitellah šuurta rakentamista ta korjaukšie, mi auttau vetyä piirih yli kymmenen miljardie rupl’ua. Šiih kuuluu päiväkojin rakentamini, stadionin uuvvistamini, Kulttuuritalon ta piirin keškuššairalan korjauš šekä toisie projektija.
Šamoin Karjalan piämiehen mieleštä piirin mahollisena kehityššuuntana on turismi. Viime vuotena Kemin piirissä kävi yli 35 tuhatta henkie.
— Olemma taipalen alušša. Vielä ei ole tarvittavua infrastruktuurie. Pitäy luatie oloja — Karjalašša tursimi jo eistyy kohti pohjoispiirijä. Kemin ta Belomorskin aglomeratijon kehityššuunnitelmah on liitetty koko vuuvvenajan spa- ta hotellikompleksin ta matkuajameriašeman rakentamini Kemin piirissä, korošti Artur Olegovič.
Rakentamisen, elinkunnallistalouven ta energetiikan ministeri Viktor Rossipnov kerto hätätalojen proplemašta.
— Jotta šijottua hätätaloissa eläjie ihmisie Kemin piirissä, pitäy rakentua vähintäh viisi viisikertaista taluo. Yhellä niistä on jo miärätty paikka ihan kaupunkin keškukšešša, šano Viktor Viktorovič.
Kemin piirissä uuteh šijotušohjelmah on lisätty 225 monikorttierista taluo, missä eläy 2400 henkie.
Artur Parfenčikov korošti, jotta ihmisie šijotetah sosialioikeuven mukah: enšin korttierija annetah niillä, ket jouvuttih vaikieh elämäntilanteheh.
Šamoin Viktor Rossipnov käsitteli vejenhankintua. On šuunniteltu toimijien vejenhankinnan verkkojen modernisointa. Tänä vuotena korjatah kakši kilometrie vesijohtuo, puhaššetah puhaššušlaittehie ta ašetetah uušie pumppuja.
Kuletušalalla Kemin piirin piäprojektina on tien rakentamini Rabočeostrovsk-pos’olkah šuaten, jotta yhistyä piirikeškuš ta merišatama. Šiih työnnetäh yli 5 500 tuhatta rupl’ua. Šamoin viranomaset halutah kunnoštua kaupunkin tieverkko.
— Meijän pitäy yhistyä kaupunkin teijen uuvvistamista ta šuurien tieobjektien rakentamista. Još rupiemma rakentamah Šatama — Kemi -tietä, šamalla urakoiččijalla pitäy šamakši aikakauvekši antua tehtävie kaupunkin tieverkon kunnoštamisekši. Toini šuuri projekti on Kemijoven piäličči olijan šillan uuvvistamini Gaiževo-pos’olkan lähellä. Še makšau noin kakšimiljonie rupl’ua, šaneli alovehen piämieš.
Tietalouven, liikentehen, pošti- ta telelaitokšen ministeri Sergei Ščebekin kerto, jotta ehätyšlautta Puanajärven yli alkau toimie jo elokuušša.
— Jatamma Kemin ta Belomorskin aglomeratijon kehittämistä. Še auttau vetyä federalisie rahavaroja vejenhankinnan, alovehen kunnoštamisen, teijen rakentamisen, kuletukšen kehittämisen proplemojen ta toisien tehtävien ratkaisomiseh. Še on tärkie instrumentti ta šen avulla rupiemma tehokkahammin ruatamah Kemin eläjien hyväkši, kirjutti Karjalan piämieš omalla VK-šivulla neuvottelun jälkeh.
Ennein kevätkuun loppuo Artur Parfenčikov henkilöhtasešti tapuau Karjalan joka piirin eläjien kera ta vaštuau heijän kyšymykših.
