Vanha kylä: Ihmiset tiijetäh kulttuurie paremmin
Sortavalan sosiali-kulttuurisešša nuorisokeškukšešša loppu kakšipäiväni etnofestivali "Vanha kylä". Tänä vuotena še näytti eri aikojen ainehellista ta ei-ainehellista karjalaista kulttuurie. Festivalin enšimmäisenä päivänä oli pietty seminari, a toisena - jarmankka ta konsertti.
Järještäjillä onnistu luatie vanhan kylän pruasniekan ilmapiirie keškukšen salissa. Muasteri-oppiloissa šai opaštuo kutomah neulalla, kesryämäh, luatimah vöitä, tanššimah. Muasterit Sortavalašta ta Petroskoista kerrottih keskiajan pukuloista, elämäntavoista, musiikista ta šoittimista.
Enšimmäistä kertua järještäjänä festivalih ošallistu istorijallisen rekonstruoinnin klubi "Terttu".
— Tänä vuotena festivali oli pienempi, kuin entisinä vuosina, ka še ei ole paha. Meilä tuli kulttuurin ihailijie ta tietäjie, kumpaset šuatih šyvempie tietoja, kumpaset tahotah tiijuštua ennemmän. Festivalin vierahilla oli mahollisuš kertuo omašta kokemukšešta, ičen opaštuo ta opaštuaki Sortavalan kollektiivija, šelitti Terttu-klubin johtaja, Vanha kylä -festivalin järještäjä Oksana Učen'.
Festivalih ošallistu niise Periodika-kuštantamo. Še toi Karjalaiset vanhat runot -näyttely esittäväkši ta kirjat myytäväkši.
Vanha kylä -festivali pietäh tuiskukuušša ta še on omissettu Kalevala-runoelmalla. Enšimmäini festivali oli pietty Sortavalašša vuotena 2017.
