Šuju-joven Soivaš-koški, mi on Priäžän piirissä on Talaja voda-kilpailujen keškipaikka. Oraškuun kešellä šielä keräyvytäh urheilijat ta vesiturismin harraštajat. Tällä kertua kilpailun eri matkoih ilmottautu 42 joukkuo ta 5 yksityisurheilijua. Hyö kilpailtih pitällä vesimatalla ta slalomissa nellä- ta kakši-ihmisen joukoissa šekä slalomissa kajakilla.
— Meilä on tärkie šäilyttyä kilpailujen kakši ošua. Pitällä vesimatalla myö tarkissamma, mitein urheilijat ošatah šuunnistautuo, mitein voijah järještyä pelaššušruatuo ta kuin ruttoh hyö melotah, šelitti kilpailujen piätuomari ta järještäjä Stanislav Maksimov.
Kilpailujen ošallistujat ollah kokenuot matkuštajat, kumpaset ošallissutah vesiretkilöih monta vuotta šekä alottelijat turismin harraštajat, kumpasilla on mukava tarkistua omie voimie.
— Mie jo ammuin halusin tulla näih kilpailuih ta olen kiitollini, jotta tänä vuotena onnistui kerätä joukko ta tulla. Vesimatka on oikein mukava ta vuatiu teknillisie tietoja ta kykyjä. Še tovellah otti äijän voimie ta näytti tovellisie urheilijie, šano vesikilpailujen järještäjä Murmanskin alovehella, Talaja voda -kilpailujen vieraš ta täyšvoittajajoukon jäšen Vitalii Čornomaz.
Kilpailujen täyšvoittajakši piäsi Karel’skoje predprijatie -joukko, kumpaseh kuulu urheilijie Karjalašta, Murmanskin ta Leningradin alovehelta. Ralli-vesimatka -nominatijošša voitti Sinii traktor -joukko (Karjala). Slalomin kakši ta nelläihmisen joukoissa voittajiksi piäsi Karel’skoje predprijatie -joukon urheilijat. Yksityiskilpailujen voittajakši kajakissa tuli Pavel Laidinen.
Melontakilpaulut pietäh perintehellisešti Karjalašša vuuvvešta 2009 alkuan. Tänä vuotena ne piettih 13. kertah.