“Kipinä” vuottau kešyä ta leikkiy stolapelilöih
Piäsi ilmah karjalankielisen Kipinä-kuvalehen oraškuun numero. Leheššä aina on äijän arvailtavua, luvettavua, leikattavua ta muistih pantavua.
Kuvalehen šivuja šelaillen šie luvet starinoja Susi Hukkasešta ta Kettu Repolaisešta, Pyörykäštä ta liikennehšiäntölöistä šekä Sergei Georgijevin kertomukšie Miikkula-kontienpojašta. “Kipinän” parissa šie tuttavuššut Terveh tulla starinah -näyttelyh, opaššut kašvattamah okurččua, luvet runoja šiitä, millä tulou kešä ta mitä kašvo pellolla, šuat tietyä mimmoni nimi antua vasikalla ta mitein pitäy käyttäytyö muate šuoriutuas’s’a.
Kuvalehti tariččou šiula matkuštamista Karjalan vesistöjä myöten Luatokan rannalla, šanarissikköjä kešäštä ta mečäštä, mukavie tehtävie ta kaunehie piiruššukšie. Šen lisäkši “Kipinäššä” on Valentina Mironovan Paimoi toivel lirahuttau- ta Marija Kirillovan Ken on talon isäntä? -juttuja. A lehen korissukšena ollah šuuret Minä – Petroskoih!- ta Hanhi -stolapelit, kumpasih šie voit pelata yštävien kera lomalla.
— Muissutamma, jotta vuuvven alušša kuvaleheššä oli ilmotettu Ken miušta tulou? -kilpailu. Šie niise vielä kerkiet ošallistuo kilpailuh! Lähetä aihien mukasie kertomukšie tai piiruššukšie Kipinä-lehen toimitukšeh 25. šyyškuuta šuaten, koroštau kuvalehen toimittaja Ol’ga Smotrova.
Parahat työt palkitah ta julkaissah leheššä ta “Kipinän” nettišivulla.
