Karjalan kodikeliden opendajad vediba ozutandurokad Petroskoiš
Karjalas 28. kerdan tehtas ”Karjalan Voden opendai”-konkurs. Sihe ühtni 33 opendajad. Kaks’ heišpäi vedäb školiš vepsän kel’t.
”Karjalan Voden opendai”-konkursas om nel’l’ nominacijad: “Deb’ut”, ”Kodikeliden opendai”, “Klassan ohjandai” da “Opendai”. Vägestuses ”Kodikeliden opendai” -nominacijas voibištelese koume opendajad. Kaks’ heišpäi vedäb školiš vepsän kel’t: Anasatasia Jevtušenko Šoutjärvespäi da Gleb Fomin Šokšuspäi. Ezmäižel päiväl konkursan ühtnikoil oliba ”Paginad openikoidenke” da mastar’-klassad anttud temoile. Tämbei opendajad vedäba ozutandurokoid školiš.
— Olen täuduline ičein urokaspäi. Kaik planuitud ozastui. Lapsed oliba tarkad, heil om hüvid kelen tedoid. Minä valičin urokan täht ”Tervhuz’” – teman, jagoihe ičeze tundmusil Anastasia Jevtušenko.
Šokšun školan opendai-žo Gleb Fomin valiči “Pereh” - teman ičeze ozutandurokan täht. Molembad opendajad kävutoitiba urokoil nügüdläižid tehnologijoid, vändiba lapsidenke, tegiba dialogoid da kodviba sadud tedoid.
Tämbei tehtas jo konkursan kahten päivän ühthevedod da valitas finalistoid, kudambad jatktaba voibištelendad homen Kostomukšas. Sen-žo päivän lopus tehtas lopprzanik, miččel tedotadas ”Karjalan Voden opendai”-konkursan vägestajad.
