Köynäs-košella voi piäštä entistä helpommin
Köynäs-koški ei ole ainuoštah mukava luonnonobjekti, vain še šäilyttäy šamoin Karjalan runonlaulajien istorijua. “Vuokkiniemi – Köynäs – Šuomi” on ikivanha laukunkantajien vesimatka. Koški on kuuvven kilometrin piäššä Vuokkiniemeštä Latvajärven šuuntah. Vaikeukšena oli še, jotta kävelytie kulki šuon läpi ta vanha polku tuli kelvottomakši, viimekši šitä restauroitih 20 vuotta takaperin.
Karjalaisen kulttuurin Viena-šeuran jäšenet piätettih kunnoštua polku, mi viey kaunehella ta väkövällä košella. Še on hyvänä lahjana Karjalan Tašavallan 100-vuotispäiväkši ta Vuokkiniemen 400-vuotispäiväkši. Liikehmieš Anatolii Samsonov anto puutavaroita puušiltoja varoin, a piirikunnan huolehtijat eläjät vaššattih avunpyyntöh. Ta nyt piäšy luonnonnähtävyöh on helppo ta mukava.
Volont’orit otettih lautoja šahalaitokšelta, vietih ne perävaunuloilla rakentamispaikalla. Vanhat hirret ta lauvat otettih pois, šentäh kun niitä myöten oli ihan mahotointa kulkie. Enšimmäisenä päivänä šuoritettih vaikein oša – luajittih šillat viijen metrin levien puron yli.
Uuši ekopolku Köynäs-košella šuaten on valmis! Kun kačot šitä, šilmyä ilahuttau ta ylpeilet yhteisšovušša šuoritettuo työtä.
Lisäkši kohta pitin polkuo ašetetah tietokylttijä, kumpaset muissutetah kävijillä, kuin tärkietä on huolehtie puhtahuošta. Tien vierellä, matan alušša, šuunnitellah ašettua Köynäs-košešta kertoja tietotaulu.
