69 ihmistä viime netälinlopušša pani šukšet jalkah, otettih nuorat ta ičevakuutušvaruštehie ta tuli startilla. Urheiluturismin ošašton opaštujat ta muasterit ošallissuttih turismin hiihtokilpailuih. Ne piettih Petroskoissa enšimmäistä kertua.
Enšin ošallistujien piti kerätä kaikki tarvittavat varuštehet, piäššä starttitarkissušta läpi. Šiitä urheilija enšin hiihti valitun kilpailutašon mukah matan ta tuli erikoiskentällä, missä piti luatie erilaisie tehtävie, järještyä ehätyš nuoralla, piäššä eštehie läpi ta šillä näyttyä urheiluturismin kykyjä.
— Uuši urheilukenttä on šuuri apulaini urheilijien valmissukšešša ta šemmosissa kilpailuissa, šentäh kun šitä voipi käyttyä muutoma urheilija šamanaikasešti. Kenttä oli avattu viime vuuvven lopušša ta nyt myö voimma käyttyä šitä enšimmäisissä hiihtokilpailuissa, šelitti kilpailujen järještäjäjoukon jäšen, Urheiluturismin liiton puhienjohtaja Stanislav Maksimov.
Kilpailušša oli 11 ryhmyä urheilijan ijän ta mestaruon mukah. Šuurin oša ošallistujista on Karjalan olimpolaisen reservin urheilukoulun kašvatit, aikuhiset ollah erilaisien turismikerhojen etuštajat. Tulokšet on ilmotettu Urheiluturismin liiton Vkontakte-ryhmäššä.
Karjalan tašavallan kilpailuissa valittih parahie urheilijie, kumpaset lähetäh etuštamah Karjalua Komi-tašavaltah.
Urheiluturismin hiihtokilpailun järještäjät nyt ruvetah valmistamah Venäjän urheiluturismin kilpailuja, kumpaset pietäh kevätkuun lopušša.