Syvyskuun 8. päivänny Karjalan piämies Artur Parfenčikov kävyi Anuksen piirin muatalovuon laitoksih. Ruadomatkan aigua Artur Olegovič kävyi, kui valdivollizih, mugai ei-valdivollizih suurih da pienih laitoksih.
Enzimäi Karjalan piämies tuttavui Olonets-agro-kooperatiivan ruadoh. Kooperatiivah kuuluu kuuzi fermerua.
– Yhtes fermeroile on helpombi sellittiä moizii kyzymyksii, sanommo, kazvoksienaitan nostamine 3 000 tonnah niškoi. Aittah nostamizeh meni 24 miljounua rubl’ua. Niilöis 14 miljounua kooperatiivu sai abuden’goinnu Muatalovuon ministerstvas, dostalit varat fermerat ližättih iče, kerdoi Artut Parfenčikov omal Vkontakte-sivul.
Anuksen piiris ruadau toinegi kooperatiivu – “AgroAljans”, sen fermerat kazvatetah puunandamii da marjoi. Tulien vuvven fermerat kačotah valmistua marmeluadua da marjuvetty Karjalan Marjat -merkil.
Ruadomatkan aigua Artur Parfenčikov mainiččigi, ku tänävuon Iljinskoje-talovuos lypsättih enämbiä maiduo. Terväh Iljinskoje-talovuoh yhtistetäh Vidlitsa-agrofirmu.
– Nygöi “Iljinskojes” on enämbi 2 500 lehmiä, ga ližävyy vie läs 300 žiivattua. Rodieu enämbi ruaduo, ga rubiemmo avvuttamah, kerdoi Artur Olegovič omal Vkontakte-sivul.