Valmiuštila Karjalašša pisyy voimašša iellähki. Šyynä on vaihtelija koronatilanneh tašavallašša. Šiitä Karjalan halličukšen issunnošša kerto Artur Parfenčikov.
– Koronatartuntojen dinamikka Karjalašša vaihtuu koko ajan. Šamalla tiijot virussista uuvvissetah joka päivä ta koronavirussin takie käyttöh otettujen rajotukšen luvettelo vaštuau tilannehta, Parfenčikov šano halličukšen issunnošša.
Karjalašša valmiuštila on voimašša 12. kevätkuuta alkuan. Kuitenki, 22. heinäkuuta rajotukšie tuaš tiukennettih: piämiehen miäräykšen mukah julkaisutoimenpitojen ošanottajien maksimimiärä on 20 ihmistä. Uuši miäräyš lakkautti entisen, 10. heinäkuuta voimah aštunuon miäräykšen, kumpasen mukah tapahtumih oli voinun ošallistuo 50 henkie.