Uz’ mahtišt keliden opendamižes
Petroskoin universitetan Baltianmeren-suomalaižiden keliden kafedral om pit’k da melentartuine istorii. Viž vot tagaze se möst tegihe Filologijan institutan kafedraks. Universitetan openduzsistem vajehtihe kogonaks Venäman Openduzministerstvan käskon mödhe. Nügüd’ korged openduzsistem om tehtud koumes pordhaspäi: bakalavriat, magistratur da aspirantur.
Kaks’ vot tagaze Baltianmeren-suomalaižiden keliden kafedral tehtihe magistraturprogramm-ki, miččen mödhe opetud bakalavrad voiba süveneda ičeze tedoid. Programman nimi om “Komparativistik. Kul’turiden dialog”. Magistraturan openduz jatkub kaks’ vot. Sigä opetas suomen, vepsän da karjalan kelid da kul’turad, kaik, mi ei mülünd bakalavriatan programmaha.
— Minä meletan, miše opendamižen aig mäni hüvin i se ei olend muite. Nece oli čoma voimuz kehitoittas, kosketadas ristituidenke, ühtneda tedokonferencijoihe da toižihe azjtegoihe. Meile tuli oza kundelta Irma Ivanovna Mullošt, kudamb starinoiči meile suomalaiž-ugrilaižiden keliden istorijas, mö oppim anglian, suomen, karjalan da vepsän kelid. Völ mö vedim openduzčasud universitetas üläopenikoiden täht, sanub Darja Švecova, magistraturan ezmäine pästnik.
Planuitas, miše täl-ki vodel Baltianmeren-suomalaižiden keliden programmaha päzuba bakalavrad. Nece om hüvä mahtišt da voimuz süveta ičeze tedoid da jatkta opeta baltianmeren-suomalaižid kelid. Nügüd’ om kezaku, se znamoičeb, miše pigai voib päzuda opendamhas magistarturaha. Kaik tedod päzundas magistraturaha voib tedištada Petroskon universitetan Internet-lehtpolel.
