Karjalašša ilmotettih piämiehen grantti-kilpailun tulokšie. KT:n kanšallisen ta alovehellisen politiikan ministerijön kannatukšella ta piämiehen grantin rahotukšella toteutetah yhekšän projektie, kumpasien joukošša on kolme karjalaisien järještöjen projektie.
Karjalan Rahvahan Liiton jäšenet valmissettih Karelija v fokuse (Karjala huomijon pistehenä) -nimini projekti. Šen rajoissa šuunnitellah valmistua kahekšan lyhyttä filmie Karjalan kylistä. Valmehie filmijä voit kaččuo joka halukaš, ne ašetetah internettih.
Veškelykšen yhteiskunnallini Oma tulehmo -järještö rupieu toteuttamah grantti-rahalla Kylii myöte -nimistä projektie. Šen rajoissa on šuunniteltu Anna lennetäh runot-linduizet Siämärven piäl -nimisen runofestivalin viettämini. Festivalie järješšetäh yheššä Karjalan Rahvahan Liiton Jessoilan alaošašton kera ta tällä kertua še on omissettu Karjalan runoilijalla Aleksandr Volkovilla. Tänä vuotena festivali pietäh online-muovošša elokuušša.
Projektin toini tehtävä on kuvata ta valmistua videoita, kumpaset kerrotah Veškelykšen kyläštä.
Lyydin vezaažed -yhteiskunnallisen järještön projekti “Lyydiläisien istorijallini vakka” niise šai rahotušta. Projektin spesialistiloilla on äijän šuunitelmie – viettyä konferenšši, järještyä muasteri-oppija, tuttavuštua ihmisie lyydiläisien istorijah ta kulttuurih. Mukava, jotta moneh toimenpitoh ošallissutah lapšet.
Projektien toteuttamini jo alko ta jatkuu tämän vuuvven loppuh.
Lisyä luvekkua Oma Mua -leheššä №26.