Vepsläine Šokš-posadan škol vaumičese Venäman ”Tervhuden parahim opendai”-konkursale. Sen täht opendajad oma vaumičenuded likundurokan, miččel openikad vändaba vepsän rahvahan vändoihe.
Likundurok modmaskoiš lapsil oli ezmäižel kerdal. No nece azj ei travind openikoiden hüvid melid. Ved’ urok oli čudokaz da ei kut toižed völ sen taguiči, miše täl kerdal likundurokal lapsed vändiba vepsän rahvahan vändoihe. Mugoižen urokan Šokšun škol ozutaškandeb online-formas Venäman konkursal, miččen nimi om “Tervhuden opendai” da vedetas täl vodel Internetan kal’t. Školan openikad da opendajad toivoba, miše mugoižed urokad tegesoiš školan tradicijaks, a vepsläižed vändod saba uden elon.
– Lapsed navediba väta, vätes heil sünduba emocijad. A konz vänd om uz’, tundmatoi lapsile, ka vätas surel melel. Erašti uz’ vänd tuleb mel’he lapsile i jäl’ges hö vändaba sihe kaiken aigan i nece om huvä. Minä tahtoin, miše vepsläižed vändod eližiba völ. Konz-se ende vätihe gr’uhoihe i nece vänd oli popul’arine, sanui Pavel Jakovlev, Šokšun školan likundurokoiden opendai.
Likundurokal oli koume vepsläšt vändod. Ezmäi lapsed sordiba gr’uhad, jäl’ges sabutadihe toine tošt mäčunke, a urokan lopus vätihe ümbruses noranke. Mugoižile urokoile lapsed tuliba ihastusel eskai kezapästusil, ved’ väta hö oma vaumhed kaiken aigan.
– Minä olen sordnu erased gr’uhad, i minun sebranikad oliba ihastuiš, miše minä olen tehnu necen azjan, homaiči Šokšun školan openik Milana Jelisejeva.
“Tervhuden opendai” om kogonaižen Venäman konkurs. Sen regionaline etap planuitihe tehta heinkus, no epidemijan taguiči se sirdihe sügüzeks. Siloi-ki nece urok snimd’as kamerale da oigetas Internetan kal’t žurijoukule. A nügüd’ lapsed harjoitelesoiš da vaumičesoiš ozutada hüvid mahtoid vepsläižiš vändoiš