Tämbei Karjalan pälidnan eläjad ühtniba “Saneluz karjalan da vepsän kelil” -akcijaha. Akcii jatkub 26. päivähasai sulakud. Sanelused kirjutadas 65 sijas.
Täl vodel “Saneluz karjalan da vepsän kelil” -akcijaha ühtneb Karjalan 17 rajonad da ümbruzkundad. Mugažo saneluz kirjutadas Vologdan, Piterin, Tverin agjoiš da ezmäižen kerdan – Severomorsk-lidnas (Murmanskan agj). Täl vodel akcijas oli registriruitud läz 1200 mest.
— Em tekoi, äjak ristituid kirjutab sanelusen. Meil om vaiše registriruitud mehiden lugetišed. No akcijan aigan mö pästam mugažo videorolikoid sanelusidenke. Erased mehed kirjutaba tekstoid kodiš vai radol joudajan aigan da kodviba iče ičtaze. Äjak om mugoižid mehid, em voigoi lugeda, sanui Karjalan rahvahaližen da regionaližen politikan ministerstvan radnik Jelena Migunova.
Täl vodel sanelusiden tekstad om omištadud perehen tradicijoile da kal’husile. Akcijan tegeb “Vepsän kul’tursebr” Karjalan pämehen grantoiden fondan da Karjalan rahvahaližen da regionaližen politikan ministerstvan rahatugel.