Praznik kaiken-se eläb!

Täl vodel ”Elonpu”-praznik om čudokaz ristituiden täht, no voib olda, sikš se jäb-ki muštho. Ved’ praznikan päpird om sen toštmatomuz’! Kuva: Gul’a Polivanova.

Enamb 30 vot ”Elonpu”-praznik keradab äjid suomalaiž-ugrilaižen mirun ezitajid adivoičetajal Vidlan mal. Kaiktäna kulub čoma vepsän pagin, artistad ihastoitaba kacujid pajoil da častuškoil, teatrezitusil da karguil... Muga oli kaikuččel vodel, no 2020. voz tuli eriližeks.

Täl vodel tradicionaline jogavoz’ne ”Elonpu”-praznik oli tehtud toižes formas.

Vidl-külän Vepsän fol’klorkeskuz tedoti pirdatusiden da kirjoitusiden konkursoiden augotišes. Kaik tahtnikad voiba ühteta konkursoihe, a 13. kezakud tedištiba ičeze satusiden polhe. Vägestajid valitihe erazvuiččiš igän kategorijoiš.

Vepsän fol’klorkeskusen avoinirdal oli tehtud ”Minun armaz ma”-sädandozuteluz. Kogonaižen päivän ristitud voiba tundištadas ozutelusen kaluidenke da ihastuda tegijoiden mastarudehe.

Andoi äi hüvid melid Vepsän fol’klorkeskusen lehtpol’ VKontakte-verkos. Ristitud erazvuiččiš tahoišpäi da eskai maišpäi voiba kulištada literatur-muzikališt kompozicijad kodiman polhe. Fol’klorkeskusen radnikad tegiba koncertan programman surel armastusel. Läz kaikuččele municipaližen Vidlän külän tahole Keskusen radnikad omištiba sijaližiden kirjutajiden pajon vai runon. Vepsän fol’klorkeskusen lehtpolele oli pandud video-ozatelused pämehilpäi, administracijan radnikoilpäi, kollektivoiden ezitused da toižed  kirjutesed, kus ristitud sanuiba äi lämid sanoid praznikan tegijoile da ristituile, ked kaikuččen voden paneba äi väged praznikan tegemižehe da vepsän kul’turan kaičendaha.

13. kezakud oli voimuz kävuda ”Sajan lahjad”-sädandozutelusele. Külän eläjad da adivod voiba arvostada mastariden radoid.

Vepsän fol’klorkeskuses ozutadihe videofil’mad enččiš ”Elonpu”-praznikoiš. Seičeme fil’mad starinoičeba, kut praznuitihe ”Elonpu”-pühäd ende. Kaik kacujad pidiba hol’t ičeze tervhudes: paniba modmaskad i oliba edahan toine toižespäi.

Ristituid ihastoitiba tradicionaližed čomitesed avoinirdal, seižutadihe enččiden praznikoiden kuvaozuteluz, kus külän eläjad voiba ecta tutabid modoid. Praznikan lavalpäi kuluiba änetadud pajod vepsän kelel.

Praznik kaiken se eläb! Täl vodel se om čudokaz ristituiden täht, no voib olda, sikš se jäb muštho. Ved’ praznikan päpird om sen toštmatomuz’! Muga-ki 2020. voz’ om čudokaz, no kaiken se jäb muštho.