Polkupyörä sosialiruatajan avukši
Muašeuvulla toimijat sosialiruatajat alettih šuaha käyttöh polkupyörie työn helpottamisekši ta nopeuttamisekši. Karjalan sosialipalvelukeškukšen Priäžän piirin yksikön Jessoilan kotihoito-ošašton johtajan Tatjana Kotovan mukah, kakšipyöräset kulkuneuvot helpotetah elintarvikkehien toimittamista ijäkkähillä ta liikuntarajotetuilla ihmisillä.
– Sosialiruataja kulkou talošta taloh painava laukku kiäššä, Kotova kertou. –Sosialipalveluja käyttävät henkilöt eletäh toisistah melkein viijen kilometrin piäššä. Jaloin kulkomini on vaikie ta tarviččou äijän aikua. Jokahisella sosialiruatajalla on viisi kuuši asiekašta.
Polkupöyrän avulla sosialiruataja voipi kulettua tavaroja muutomalla atressilla kerrallah. Hiän voipi laittua ruokatavarat, liäkkiet, pešuainehet, talouštavarat polkupyörän korih.
Karjalan sosialipalvelukeškuš šai enšimmäiset kymmenen polkupyöryä ruatajilla viime šajekuušša. Tänä vuotena 96 polkupyöryä on jo juattu Belomorskin, Kemin, Lahenpohjan, Louhen, Karhumäjen, Pitkärannan, Segežan, Šuojärven, Onegarannan ta Priäžän piirilöissä toimijilla sosialiruatajilla.
Kakšipyöräset kulkuneuvot hankitah enšišijasešti kotihoito-ošaštojen ruatajilla.
Yksityiset šijoittajat niise myönnetäh rahua kulkuneuvojen oštamiseh sosialiruatajilla. Šulakuušša 2020 mobiiliyhtivö luovutti kolme polkupyöryä sosialipalvelukeškukšen ruatajilla. Viime vuotena muutoma pankki myönti rahua polkupyörien oštamiseh.
