Uuši palliatiivini keškuš on alottan toimintah Petroskoissa. Keškukšešša on 48 paikkua yli 18-vuotisilla parantamattomilla läsijillä, kumpaset eletäh Petroskoissa ta Karjalan piirilöissä. Palliatiivisen keškukšen varapiäliäkäri Irina Petrova kertou, jotta nyt keškukšešša on 36 potilašta.
Uuši keškuš toimiu entisen perinatalisen keškukšen tiloissa. Korjauštöih myönnettih noin 16 miljonie rupl’ua.
– Nyt Karjalašša on rekisteröity yli 4 500 palliatiivista hoituo tarviččijua potilašta. Palliatiivini hoito kehittyy kaikkiella Karjalašša. Kaikki piirišairalat on šuatu lisenssit palliatiiviseh hoitoh. Erittäin tärkietä on kehittyä avohoituo vaikiešti läsijillä, Karjalan tervehyšministeri Mihail Ohlopkov šanou.
Palliatiivisešša keškukšešša on toimintavälinehvuokruamo, kumpasešta potilahan lähiset vuokratah makšamatta hoitolaittehie ta šairalašänkyjä.
Karjalan tervehyšministerijön tiijotukšešša kerrotah, jotta tänä vuotena Karjalan b’utžetista on myönnetty yli 19 miljonie rupl’ua palliatiivisen hoijon kehitykšeh. Rahua käytetäh liäkkeijen ta hoitolaittehien oštamiseh.