Neruo Jessoilaspäi
Kuvailutaijon, dekorativizen da käytöllizen taijon ozuttelu on valmistettu Neruo kyläspäi -projektan hantuzis. Ozuttelus voibi kaččuo ei-ammatillizien taidoilijoin kuvii, luajilmuksii tuohes da saves, kirjoindehii, nieglottuloi veššilöi da äijii toizii luajilmuksii. Ozuttelu on luajittu yhtes Jessoilan Kielen kirju -etnokul’tuurukeskuksenke.
— Olen hyväs mieles, ku juuri tämä ozuttelu avai meijän uvven ozutteluvuvven. Jo äijän vuottu olemmo yhteisruavos Jessoilan Kielen kirju -keskuksen kel. Keskukses ruatah nerokkahat rahvas, Tatjana Ledn’ova kerto.
Kielen kirju -keskuksen erähii ruadoloi on karjalan kielen kehittämine. Sih niškoi Jessoilas pietäh karjalan kielen kursiloi da luajitah mul’tfil’moi karjalan kielel. Mul’tfil’moi valmistetah lapsien Valgien kodine -stuudien taidoilijat. Ozuttelun avajazis ozutettih stuudies luajittu Piiterih käyndy -mul’tfil’mu Kindahan mužikoin šeikkailuloih nähte karjalan kielel. Pidäy mainita, ku tämä mul’tfil’mu rodih voittajakse Ven’an luomisruavon kilvas vuvvennu 2019. Valgien kodine -stuudii ruadau Kielen kirju -keskuksen tyves vuvves 2006. Lapset piirustetah da luajitah mul’tfil’moi Oleg Obnosovan johtol.
