“Openduz da tedorad. Man da rahvahan hüvüdeks” – ühthižvenälaine konkurs mäni muloi. Sen ühthevedod tehtihe voden lopus, a tedotadihe satusiš 2024. voden augotišes. “Minun pedagogine iniciativ”-nominacijas vägesti Lodeinijan Pöudon školan №1 opendai Nadežda Fokina.
— Konz minä tedištin vägestuses konkursas, lujas čududelimoi. Minai oliba kündled sil’miš ihasusespäi. Necen vägestusen minä omištan kahtele čomale naižele Zinaida Strogalščikovale da Nina Zaicevale. Kitän kaikid ozatelendoiš da toivotusiš.
Nadežda zavodi opeta vepsän kel’t kut fakul’tativ školas vodel 2016. Konkursale hän oigenzi ičeze projektan ”Vepsän rahvahan kelen da veroiden opendamine fakul’tatival”. Kaiked konkursaha ühtni enamba 3000 mest kaikes Venämaspäi.