Lendkompanijad zavodiba udes lendandad Petroskoišpäi Moskvaha koronavirusan keskustan jäl’ghe. Ezmäine lendand Petroskoišpäi Venäman suvehe tehtas 16. kezakud.
Petroskoišpäi udes voib päzuda lendmašinal Moskvaha da Venäman suvehe pandemijan taguiči tehtud keskustan jäl’ghe. Lendandad Moskvaha zavodihe 5. kezakud. Lendmatk Petroskoišpäi lähteb 17:35 časud da tuleb Moskvaha 19:10 časud.
Aigmäran mödhe lendandad oma pätničan da pühäpäivän. 15. päiväspäi kezakud ned oma nel’l’ kerdad nedališ: ezmärgen, koumanz’päivän, pätničan da pühäpäivän.
Ezmäine lendmašin Petroskoišpäi suvehe, Anapaha, lähteb 16. kezakud. Kaik lendandad tehtas kaikiden Rospotrebnadzoran sändoiden mödhe.
Männuzil vozil äjad Karjalan eläjad oma lendnuded Moskvaha da Venäman suvilidnoihe Petroskoin aeroportaspäi. Moskvaha lendai Pobeda da suvilidnoihe lendai Severstal’ sanuiba sulakun augotišes lendmižiden keskustamižes koronavirusan taguiči.
Lugekat neciš Karjalan Sanomat-lehteses suomeks i Oma Mua-lehteses karjalaks.