Petroskoihe tulijad matkustajad voiba kävuda ostmižile vaiše ehtal. Mugoižen azjbumagan allekirjuti Petroskoin lidnan pämez’ Irina Mirošnik. Azjbumagan mödhe röunatuz koskeb vaiše toižiš Venäman agjoišpäi Petroskoihe tulijoid gruppmatknikoid.
”Matknikoiden gruppad voiba päzuda produktoiden laukoihe vaiše ehtal 20:00 – 22:00 časud. Röunatuz ei koske muštlahjlaukoid. Ned radaba matknikoiden täht kut i tobjimalaz”, starinoitas Petroskoin merijas.
Keväz’kun keskespäi mugoižed röunatused radaba Karjalas eläjile pensiimehile. Karjalan pämehen Artur Parfenčikovan azjbumagan mödhe ne, kenele om enamb mi 60 vot voiba kävuda ostmižile vaiše homendesil 9:00 – 11:00 časud.