Školsömsijoiden rad vajehtase Karjalas
Karjalan valdkundan školiš maksutont lämäd sömišt taritas kaikile augotižškolan openikoile necen voden sügüz’kuspäi.
Karjalan openduzministerstvan Roman Golubevan sanoiden mödhe augotižškolas opendase läz 30 000 last. Augotižškolan openikoiden sömladimižen täht tariž 270 miljonad rubl’ad. Karjalas om 199 školad, kus om iče sömsija. Golubevan mödhe kaik školsömsijad oma vaumhed vastmaha augotižškolan openikoid. Vaiše 69 sömsijas kodvindas löutihe problemoid. Niiden suremb pala koskeb pindad. Erasiš školiš sömsijad oma muga pened, miše openikad ei ehtkoi sada lämäd sömäd märaigan.
Suremb pala Petroskoin openduzsauvotusid om saudud 1980-voz’sadal. Sömsijoiden avaruz’ ei vasta nügüd’laižihe küzuihe.
– Openikoiden sömižihe tartujiš küzundoiš pagištihe Venäman openduzministerstvanke da Rospotrebnadzoranke, sanub Roman Golubev.
